Per Bergerud

Frå Wikipedia – det frie oppslagsverket
Hopp til navigering Hopp til søk
Per Bergerud
Statsborgarskap Noreg
Fødd 28. juni 1956 (65 år)
Flesberg
Idrett skihopping
Tok del i

Vinter-OL 1984, Vinter-OL 1976, Vinter-OL 1980

Utmerkingar

Holmenkollmedaljen

Per Bergerud (fødd 28. juni 1956) er ein tidlegare norsk skihoppar frå Flesberg i Buskerud, og noverande næringsdrivar. Han vart verdsmeister i 1985 då han vann rennet i storbakken i Innsbruck. I 1982 var han saman med Johan Sætre, Ole Bremseth og Olav Hansson med på laget som i Oslo vann den fyrste verdsmeisterskapen i skihopping for lag. Mellom 1978 og 1985 vart han noregsmeister åtte gonger. Han var medlem av Svene IL.

Skihoppar[endre | endre wikiteksten]

Bergerud debuterte internasjonalt i den tysk-austerrikske hoppveka i 1974. Fyrst i 1977-sesongen slo han gjennom, kom då på medaljeplass i begge NM-renna og var som best på ein sjuandeplass i verdscupen. Sin fyrste siger i store, internasjonale tevlingar kom i 1978 i Bergiselbakken i Innsbruck, under den tysk-austerrikske hoppveka. Same sesongen vart han norsk dobbeltmeister. Dobbel noregsmeister vart han også i 1983. Gjennom åra vann Bergerud åtte NM-gull, to sølvmedaljar og to bronsemedaljar. Siste NM-gullet kom i 1985. I alt mottok han fem kongepokalar. I 1979 sigra han i Holmenkollen etter ein spennande duell med Johan Sætre.

Verdscupen i skihopping vart arrangert frå sesongen 1979/80. Bergerud vann dei neste sesongane i alt fire verdscuprenn. Det fyrste var eit skiflygingsrenn i Vikersund i 1980, sidan vann han to renn i Engelberg, 1981 og 1983. I mellom sigrane i Engelberg, vann han i 1982 sin andre siger i den tysk-austerrikske hoppveka, og atter i Innsbruck. Totalt vart han då nummer tre i hoppveka, bak den klare vinnaren Manfred Deckert og Roger Ruud. Bergeruds beste samanlagtplassering i verdscupen var femteplassen i 1983-sesongen.

Bergerud hamna eit godt stykke ned på resultatlistene i dei fleste internasjonale meisteskapane. I ski-VM 1978 i Lahti vart han nummer 11 i normalbakken som best, medan han under vinter-OL 1980 Lake Placid vart nummer 16 og 18 i dei to renna. Under ski-VM 1982 i Oslo var han med på gullaget i lagtevlinga, men bokførte 11. plassen i storbakkerennet som sin beste individuelle prestasjon.

Høgdepunktet for skihopparen Bergerud kom under Ski-VM 1985 i Seefeld, der han gjekk til topps i storbakken, Bergiselbakken i Innsbruck, og tok bronsemedaljen i normalbakken i sjølve Seefeld. I ei jamn tevling i Bergiselbakken, der Bergerud leia etter fyrste omgang, vann han føre finnane Jari Puikkonen og Matti Nykänen.

Besteplasseringar i internasjonale meisterskap og renn[endre | endre wikiteksten]

  • 1975: Nr 15 i Bischofshofen
  • 1976: Nr 12 i Holmenkollen
  • 1977: Nr 7 i Bischofshofen
  • 1978: Siger i Innsbruck
  • 1979: Siger i Holmenkollen
  • 1980: Siger i Vikersund (skiflyging)
  • 1981: Siger i Engelberg, ein andreplass (Garmisch-Partenkirchen) og to tredjeplassar (Bischofshofen og Harrachov)
  • 1982: Siger i Innsbruck, to andreplassar (Sapporo og Planica)
  • 1983: Siger i Engelberg, andreplass i St. Moritz og tredjeplass i Cortina d'Ampezzo
  • 1984: Andreplass i Bischofshofen og tredjeplass i Liberec
  • 1985: Verdsmeister i storbakken i Innsbruck, bronsemedalje i normalbakken i Seefeld. To tredjeplassar i verdscupen

Medaljar og besteplasseringar i noregsmeisterskap[endre | endre wikiteksten]

  • 1974: Nr 7 både i normalbakken og storbakken, i høvesvis Trondheim og Meldal
  • 1975: Nr 6 i normalbakken i Rælingen
  • 1976: Nr 4 i storbakken på Rena
  • 1977: Sølvmedalje i normalbakke på Vang, bronsemedalje i storbakken på Odnes
  • 1978: Gullmedalje både i normalbakke på Konnerud og i storbakken på Lillehammer
  • 1979: Gullmedalje i storbakken i Bærum, sølvmedalje i normalbakken i Sprova
  • 1980: Bronsemedalje i normalbakken i Asker
  • 1981: Nr 4 i normalbakken i Rælingen
  • 1982: Nr 6 både i normalbakken på Raufoss og i storbakken på Rena
  • 1983: Noregsmeister både i normalbakken i Mo i Rana, og i storbakken på Lillehammer
  • 1984: Noregsmeister i normalbakken på Kongsberg
  • 1985: Noregsmeister både normalbakken i Bardu og i storbakken i Bærum
  • 1986: Nr 8 i normalbakken på Vang

I 1985 vart Bergerud tildelt Holmenkollmedaljen

Kjelder[endre | endre wikiteksten]

  • Sportsboken, aktuelle årgangar

Bakgrunnsstoff[endre | endre wikiteksten]