Piperensar

Frå Wikipedia – det frie oppslagsverket
Ein enkel kvit piperensar.

Piperensar er ein børste laga av ein eller fleire ståltrådar med påspunne fiber som kan brukast til å reinska innsida av halsstykket på ei tobakkspipe eller andre tronge hole reiskapar, som medisinske instrument. Fibrane verker som ein børste, og ståltråden gjer han bøyeleg. Ved å staka og vri piperensaren i halsen på pipa kan ein reingjera henne. I nyare tid er piperensarar og blitt eit viktig formingsmateriale.

Fiberet ein bruker på piperensarar er ofte eit absorberande tekstil som bomull eller viskose. I tillegg kan ein bruka stivare materiale som nylon eller polypropen som gjer at ein kan skrubba betre. Nokre piperensarar smalnar i eine enden slik at han kan nå inn i tronge holrom.

Hovudgrunnen til at ein ønsker å rensa pipa er for å fjerna den sure «pipesausen», som også blir kalla «pipelort».[1] Denne øydelegg smaken av tobakken og må fjernast regelmessig.

Forming[endre | endre wikiteksten]

Forming med piperensarar.

Piperensarar blir også brukt til ulike formingsprosjekt fordi dei er bøyelege og held på forma dei får. Piperensarar laga for dette føremålet er ofte laga med polyester- eller nylontråd og er ofte lengre og tjukkare enn tradisjonelle piperensarar. Dei finst også i mange ulike fargar. Piperensarar er utbreidde formingsmateriale i barnehagar og skular.[2]

I Japan er forming med piperensarar kjend som mogol-kunst. Namnet er avleidd frå det portugiske «mughal» (mogul) om ei form for veving.[3]


Kjelder[endre | endre wikiteksten]

  1. «pipelort» i Det Norske Akademis ordbok
  2. «Pipe cleaner artist», news.yahoo.com (på engelsk), henta 28. mars 2020 
  3. «Mogol art», www.craftjam.jp, arkivert frå originalen 15. februar 2020, henta 28. mars 2020