Potosí-departementet

Potosí-departementet
departement
Flagg Symbol
Land	Bolivia
Hovudstad	Potosí
Areal	118 218,0 km²
Folketal	861 292 (2024)
Potosí-departementet 20.66666667°S 66.66666667°W / -20.66666667; -66.66666667
Wikimedia Commons: Potosí Department

Potosí-departementet er eit av dei ni departementa som Bolivia er delt inn i. Hovudstaden og den mest folkerike byen er Potosí, som er kjend for dei rike førekomstane av edelmetall.

Departementet ligg sørvest i landet og grensar i nord til departementa Oruro og Cochabamba, i aust til Chuquisaca og Tarija, og i sør til Jujuy-provinsen i Argentina. Grensa mot Argentina går fram til treriksgrensa ved Cerro Zapaleri, der grensa mot Chile tek til. Mot vest grensar Potosí til dei chilenske regionane Antofagasta og Tarapacá-regionen. Ifølgje den offisielle folketeljinga til Bolivias nasjonale statistiske institutt (INE) frå 2024 har departementet 861 292 innbyggjarar. Folketettleiken er 7,6 innbyggjarar per km², noko som gjer Potosí til det tredje minst tettfolka departementet i Bolivia, etter Beni og Pando. Departementet vart oppretta i 1826.

Administrativt er Potosí delt inn i 16 provinsar, som igjen er delte inn i 41 kommunar. Kommunen Potosí er den mest folkerike, med 218 336 innbyggjarar, tilsvarande 23 % av den samla folkesetnaden i departementet.

Økonomien i Potosí har hatt sterk vekst dei seinare åra. Departementet har tradisjonelt vore ein viktig produsent av mineral, noko som har gjort det til den femte største økonomien blant departementa i Bolivia.

Geografi

Geografien i Potosí er prega av geysirar, fumaroler, vulkansk leire, varme kjelder og svovelhaldige kjelder. Det karrige landskapet i Cordillera Occidental er brote opp av innsjøar og dalar mellom fjella. Klimaet i departementet er hovudsakleg kaldt, medan dalane mellom fjella har eit meir temperert klima.

Eit av dei kaldaste områda i Bolivia er Salar de Uyuni, verdas største saltslette, der temperaturen om vinteren kan falle til −20 °C. Altiplano er kjenneteikna av lite nedbør, vanlegvis 100–200 mm årleg. Etter Köppen si klimaklassifisering har departementet hovudsakleg kaldt ørkenklima (BWk), følgd av kaldt halvtørt klima (BSk).

Departementet er for det meste fjellendt, med store høglandsområde og mange dalar med svært ulike mikroklima.

Ein av dei viktigaste fjelltoppar er Uturuncu, som med ei høgd på 6008 moh. er det tolvte høgste fjellet i Bolivia.

Sørvest i departementet ligg Cerro Zapaleri på 5653 moh., som markerer treriksgrensa mellom Bolivia, Argentina og Chile.

Hydrografi

Elvane i Potosí-departementet renn mot alle dei tre store nedbørfelta i Bolivia. Mot Amazonas renn mellom anna elvane Caine, Chayanta og Guadalupe. Mot Río de la Plata renn mellom anna Pilcomayo, Motaca og Tumusla. I tillegg finst eit lukka nedbørfelt på Altiplano, der Márquez renn ut i Lago Poopó, medan Río Grande de Lípez renn ut i Salar de Uyuni. Det finst òg mindre vassdrag som dannar mindre innsjøar, mellom anna Laguna Colorada og Laguna Verde.

Flora og fauna

Trass i det tørre og ørkenprega miljøet i store delar av departementet finst det eit rikt biologisk mangfald, med mange artar som er tilpassa det harde klimaet og den avgrensa tilgangen på ressursar.

Floraen omfattar mellom anna fleire artar av kaktusar. Vegetasjonen blir rikare mot den nordaustlege delen av departementet, som grensar til Chuquisaca og ligg lågare og har meir nedbør.

Blant pattedyra finn ein artar av gnagarar, kameldyr som vikunja, lama og alpakka, kattedyr som puma og andre artar. Blant fuglane er andeskondoren ein karakteristisk art i dei høge fjellområda, medan flamingoar er talrike ved innsjøane på Altiplano.

Nokre av artane er truga av utrydding som følgje av ukontrollert jakt og manglande kontroll frå styresmaktene.

I Potosí er det oppretta to verneområde for å ta vare på den opphavlege floraen og faunaen i Bolivia. Det eine er Reserva Nacional de Fauna Andina Eduardo Avaroa, som ligg heilt sør i departementet ved grensa til Chile og Argentina. Det andre er Parque Nacional Torotoro, som ligg nord i departementet på grensa mot Cochabamba.

Kjelder

• Denne artikkelen bygger på «Departamento_de_Potosí» frå Wikipedia på spansk, den 6. september 2026

Bakgrunnsstoff

Commons har multimedium som gjeld: Potosí-departementet

• Offisiell nettstad