Rainer Stenius
| Rainer Stenius | |
|
| |
| Statsborgarskap | Finland |
| Fødd | 19. mars 1943 Helsingfors |
| Død |
5. desember 2014 (71 år) |
| Idrett | friidrett |
Rainer Konrad Stenius (19. mars 1943–2014) var ein finsk lengdehoppar frå Helsinki som vann sølvmedaljen i øvinga under EM i friidrett 1962 i Beograd. Han var finsk rekordhaldar i lengdehopp frå 1966 til 2005.
Friidrett[endre | endre wikiteksten]
Stenius vart finsk meister i lengdehopp i 1962, 1965 og 1966. Under europameisterskapen 1962 i Beograd sette han personleg rekord med 7,85 m og vann sølv, landsmannen Pentti Eskola vann bronsen, han òg med 7,85 i sluttprotokollen. Einast favoritten Igor Ter-Ovanesjan frå Sovjetunionen stekte seg lengre enn dei to finlendarane. Stenius forbetra sitt personbeste til 7,89 m då han vann øvinga i eit stemne i Turku 14. juni 1963. Ut over i juni og juli månad 1965 flytta Stenius den personlege rekorden tre gongar, sist til 8,00 m i Salo. Den 7. august i Jyväskylä tangerte han så den finske lengderekorden til Eskola på 8,04 m, før han ei veke seinare i Helsinki hoppa 7,89 m og vart nordisk meister.
Den 6. mai 1966 sette Stenius nordisk rekord i Los Angeles med eit hopp på 8,16 meter. Prestasjonen vart verande finsk rekord inntil Tommi Evilä den 12. august 2005 landa på 8,18 m. Seinare i 1966-sesongen vart Stenius femtemann i lengdehopp ved Budapest-EM, der han som best nådde 7,68 m. Ein langvarig skade i hælsena (akillesen) gjorde at han la opp i 1967.
Ymse[endre | endre wikiteksten]
Stenius studerte i mange år i USA, fyrst ved University of San Francisco. I 1976 tok han ein doktorgrad i idrettsvitskap ved University of Oregon. Han arbeidde som trenar i USA like til 1992. Dei neste fem åra livnærte han seg som sportsfiskar i Costa Rica. I 1997 vende han heim til Finland der han på ny arbeidde som idrettstrenar.
Stenius døydde i Espoo hausten 2014. Han hadde lege død i sju veker då han vart funnen i heimen sin den 5. desember. Grava hans var utan stein til dess stavhopparen Risto Ankio og andre tidlegare landslagskollegaer kjøpte ein stein i 2018.
Kjelder[endre | endre wikiteksten]
- Denne artikkelen bygger på «Rainer Stenius» frå Wikipedia på finsk, den 21. juni 2019.
- Denne artikkelen bygger på «Rainer Stenius» frå Wikipedia på svensk, den 21. juni 2019.