Hopp til innhald

Sanya Richards-Ross

Frå Wikipedia – det frie oppslagsverket
(Omdirigert frå Sanya Richards)
Sanya Richards-Ross


StatsborgarskapUSA
Fødd26. februar 1985 (41 år)
Kingston på Jamaica
Idrettfriidrett
Tok del i Sommar-OL 2008, Sommar-OL 2012, Sommar-OL 2004

Sanya Richards-Ross (fødd 26. februar 1985) er ein USA-amerikansk tidlegare friidrettsutøvar, fødd i Kingston på Jamaica, som internasjonalt tevla i 400-metersløp. Ho vann fem VM-gull og fire OL-gull på 400 meter og 4 x 400 m stafett i tida 2003-12. Richards vart verdsmeister på 400 m i 2009 og olympisk meister på same distansen under Sommar-OL 2012 i London. Hennar personlege rekord på 400 m, 48,70 sekund, oppnådd i 2006, var landsrekord for USA til 2025.

Richards kom til USA med familien då ho 12 gammal. Seks år seinare vart ho nasjonal meister på 400 meter for fyrste gong, ein prestasjon ho gjentok i 2005, 2006, 2008, 2009 og 2012. Under VM i friidrett 2003 sprang ho den siste etappen for USA sitt vinnarlag i 4 x 400 m stafett. Sommaren 2004 sprang ho for fyrste gong under 50 sekund på 400 m, med tida 49,89 kom ho på andreplass ved den nasjonale meisterskapen i Sacramento. Ein månad seinare vann ho si fyrste olympiske gullmedalje med USA i 4 x 400 m stafett. Ved Friidretts-VM 2005 tok Richards sølvmedaljen på 49,74. Einast ni dagar etter forbetra Richards sitt personbeste på 400 meter då ho fekk notert 48,92 sekund i Zürich, årsbeste i verda. 16. september 2006 i Aten sletta ho den 22 år gamle landsrekorden til Valerie Brisco-Hooks på 400 m. Richards oppnådde då livsbeste 48,70 sekund. Ei veke tidlegare sette ho i Stuttgart personleg rekord med 22,17 sekund på 200 meter.

I den nasjonale meisterskapen 2007 vart Richards nummer 2 på 200 m og 4 på 400 m. Under verdsmeisterskapen i Osaka kom ho på femteplass på 200 m, før ho atter spurta USA inn til siger på den lange stafetten. Også i Sommar-OL 2008 fekk ho gleda av å springe USA inn til triumf i 4 x 400 m stafett, sjølv fekk ho bronse på 400-meteren. Medaljesankinga heldt fram med gullmedaljar på både 400 m og i 4 x 400 m stafett då verdsmeisterskapen i friidrett 2009 vart avvikla i Berlin. Gjennom sesongen stod ho for ei rekke gode 400-meterløp, det beste på 48,83 sekund i Brussel tidleg i september.

Richards-Ross stod over det meste av 2010-sesongen, grunna skade. Ho kvalifiserte seg til VM 2011, der ho sprang den fyrste etappen for eit USA-mannskap som nok ein gong kom fyrst over målstreken i 4 x 400 m stafett. I New York den 9. juni 2012 presterte ho livsbeste 22,09 sekund på 200 meter. Under sommarleikane 2012 vart Richards olympisk meister på 400 m på 49,55 sekund, 0,15 sekund føre britiske Christine Ohuruogu. Ho avslutta leikane med å distansere dei andre laga på ankeretappen på den lange stafetten. I 2015 fekk Richards-Ross ein sølvmedalje i 4 x 400 m stafett ved Friidretts-VM i Beijing. Ho la opp i 2016.

Medaljar og plasseringar i internasjonale meisterskap

[endre | endre wikiteksten]
  • VM 2003 i Paris: Utslått i semifinalane på 400 m (51,32= nr 11). Gull i 4 x 400 m stafett
  • OL 2004 i Aten: Nr 6 på 400 m – 50,19. Gull i 4 x 400 m stafett
  • VM 2005 i Helsinki: Sølvmedalje på 400 m – 49,74, bakom Tonique Williams-Darling (49,55)
  • VM 2007 i Osaka: Nr 5 på 200 m – 22,70. Gull i 4 x 400 m stafett
  • OL 2008 i Beijing: Bronsemedalje på 400 m – 49,93. Gull i 4 x 400 m stafett
  • VM 2009 i Berlin: Gullmedalje på 400 m – 49,00, framom Shericka Williams (49,32). Gull i 4 x 400 m stafett
  • VM 2011 i Daegu: Nr 7 på 400 m – 51,32. Gull i 4 x 400 m stafett
  • OL 2012 i London: Gull på 400 m – 49,55 og i 4 x 400 m stafett. Nr 5 på 200 m – 22,39.
  • VM 2015 i Beijing: Sølvmedalje i 4 x 400 m stafett