Sigbjørn Hølmebakk

Sigbjørn Hølmebakk
Statsborgarskap	Noreg
Fødd	2. februar 1922 Feda
Død	25. november 1981 (59 år) Oslo
Yrke	skribent, manusforfattar
Born	Arnstein Hølmebakk, Marianne Hølmebakk
Prisar	Doblougprisen, Gyldendals legat
Sigbjørn Hølmebakk på Commons

Sigbjørn Hølmebakk (fødd 2. februar 1922 i Kvinesdal, død 25. november 1981) var ein norsk forfattar. Han var bror av forlagsmannen og forfattaren Gordon Hølmebakk. Hølmebakk var òg aktiv i folkerørsla mot atomvåpen i Noreg. Han var aktiv på venstresida i politikken, mellom anna i høve til avisa Orientering, og var ein av dei som gjorde opptak til stiftinga av Sosialistisk Folkeparti. I 1961 skreiv han artikkelen «Brønnpisserne» om mistenkeleggjering og personforfylgjing av kommunistar og andre radikale.

Hølmebakk debuterte litterært i 1950 med novellesamlinga Ikke snakk om høsten. Som forfattar var han realist, som skreiv om eksistensielle spørsmål med driv og sterke miljøskildringar. Han vart ein folkekjær forfattar før han døydde berre 59 år gamal.

Fleire av Hølmebakk sine romanar vart det laga spelefilm av. Fimbulvinteren (1964) om tyskarane si brenning av Finnmark vart filmatisert som Brent jord i 1969, regi Knut Andersen. Hurra for Andersens vart filmatisert i 1966, regi Knut Andersen. Jentespranget (1970) vart filmatisert i 1973, regi Knud Leif Thomsen. Karjolsteinen (1975) vart filmatisert i 1977, regi Knut Andersen.

Bauta ved Feda skule Kvinesdal.

Verkliste

• Ikke snakk om høsten – noveller (1950)
• Det hvite fjellet – roman, (1954)
• Menneskefiskeren – roman (1956)
• Salve sauegjeter– barnebok, (1959)
• Emigranten – roman, (1959)
• Fimbulvinteren – roman, (1964)
• Hurra for Andersens – roman, (1966)
• Jentespranget – roman, (1970)
• Tolv trøndere og to andre fortellinger – noveller, (1973)
• Hundevakt, grålysning – artiklar, (1974)
• Karjolsteinen – roman (1977)
• Sønnen – roman, (1978)
• Fredlaustona – ikkje fullført, utgjeve (1983)
• Liljer i snøen – noveller og reisebrev frå 1950- og 1960-talet (1992)
• 13 noveller – noveller i samling (2004)

Drama

• Det siste kvarter – høyrespel, NRK (1960)
• Et lite kapitel av en stor manns dagbok – høyrespel, NRK (1961)
• Det siste kvarter – NRK fjernsynsteatret (1962)
• Heltedød til salgs – Det Norske Teatret (1968)
• Pappa er ikke glad i oss lenger – NRK fjernsynsteatret (1971)

Prisar

• Gyldendals legat 1956
• Kritikerprisen 1975, for Karjolsteinen
• Doblougprisen 1976