Sigurd Verdal

Frå Wikipedia – det frie oppslagsverket
Hopp til navigering Hopp til søk
Sigurd Verdal
Fødd 4. juni 1927
Død 27. august 2010
Parti Arbeidarpartiet

Sigurd Verdal (4. juni 192727. august 2010) var ein lærar og politikar frå Eiken i Vest-Agder. Han representerte Arbeidarpartiet og Vest-AgderStortinget i tida 1981 til 1993.

Då han var fem år gammel flytta han til garden Verdal i Eiken. 13 år gammal melde han seg inn i Eiken AUL. I 1949 vart han student frå Sørlandets gymnas i Kvinesdal, og utdanna seg så til lærar, tok eksamen ved Kristiansand lærerskole i 1953.

Verdal arbeidde frå 1953 i framhaldsskulen i Byremo i Audnedal kommune, og frå 1958 i realskulen, då denne kom i staden for framhaldsskulen. Åra frå 1969 til 1981, då han vart stortingsrepresentant, var han skulesjef i Audnedal.

På fritida engasjerte Verdal seg i idrettsrørsla. Han var 1962-64 formann i Grindheim IL, 1965-69 formann i Vest-Agder skikrins og styremedlem i Norges Skiforbund 1969-76 og 1977-82.

Frå 1981 til 1993 var Verdal stortingsrepresentant. Han var medlem av Landbrukskomiteen fram til 1989. Medan Syse-regjeringa sat ved statsroret, 1989-90, var han medlem av Samferdslekomiteen. Etter Gro Harlem Brundtland i november 1990 vart statsminister for tredje gong, flytta Verdal over i landbrukskomiteen att, då som nestleiar. Elles var han nestleiar av Kontrollkomiteen 1986-89 og leiar 1989-90. Styreformann i Løvebakken mållag 1986-88.

Verdal var leiar av Omsetningsrådet under Statens Landbruksforvaltning frå 1992 til 2000.

Kjelder[endre | endre wikiteksten]