Direktoratet for medisinske produkt

Direktoratet for medisinske produkt
Org.form	Organisasjonsledd
Org.nr.	974761122
Bransje	Regulation of the activities of providing health care, education, cultural services and other social services, excluding social security
Skipa	1974
Eigar	Helse- og omsorgsdepartementet
Morselskap	Helse- og omsorgsdepartementet
Hovudkontor	Oslo
Land	Noreg
Tilsette	401 (12. mai 2026)
Nettstad	https://www.dmp.no/ (norsk)

Direktoratet for medisinske produkt (DMP), tidlegare Statens legemiddelverk, er eit norsk forvaltningsorgan underlagt Helse- og omsorgsdepartementet.

DMP skal sørge for rask og likeverdig tilgang til effektive legemiddel og medisinsk utstyr. Direktoratet følger opp sikkerheita og bidrar til riktig bruk av produkta. DMP har ansvar for nasjonal forsyningssikkerheit og beredskap for medisinske produkt. Dessutan bidrar DMP til forsking og innovasjon når det gjeld medisinske produkt.

Oppgåver

• Godkjenne legemiddel og bidra til utvikling av medisinske produkt gjennom vitskapeleg rettleiing og godkjenning av kliniske studiar.
• Bidra til at medisinske produkt er trygge nok å bruke – både før og etter at dei kjem på marknaden. Dette skjer mellom anna gjennom overvaking av biverknader og uønska hendingar, og laboratoriekontroll av legemiddel.

• Bidra til at fellesskapet sine ressursar blir brukt best mogleg og at pasientar får likeverdig tilgang til ny behandling. Dette skjer mellom anna gjennom helseøkonomiske vurderingar av legemiddel som er aktuelle for offentleg finansiering.
• Overordna heilskapleg ansvar for nasjonal forsyningssikkerheit og beredskap for legemiddel og medisinsk utstyr. Dette inkluderer oppfølging av meldingar om legemiddelmangel.
• Bidra til at legemiddel blir brukt slik at dei gir best mogleg effekt og minst mogleg risiko for pasientane. Dette inkluderer godkjenning av produktinformasjon og allmennmedisinsk rådgjeving til helsepersonell.

Arbeidet i DMP er tett integrert i det europeiske samarbeidet gjennom EØS-avtalen. Dette gjeld mellom anna godkjenning av legemiddel, som i all hovudsak skjer sentralt i Europa ved at Norge er knytta til Det europeiske legemiddelbyrået (EMA).

Organisasjon

DMP er delt inn i fire område: Rask tilgang, riktig bruk, sikker forsyning og virksomheitsstyring og -utvikling. DMP er ein prosessorganisert organisasjon der arbeidsoppgåvene blir løst i lag på tvers av einingar og område.

Trygve Ottersen begynte som direktør i DMP 18. november 2024.

Historie

I 1974 vart Statens legemiddelkontroll oppretta då Spesialitetskontrollen og Statens farmakopelaboratorium vart slått saman. Namnet vart endra til Statens legemiddelverk (ofte berre kalt Legemiddelverket) i 2001 da etaten tok over forvaltingsoppgåver frå fleire andre organ. Frå Statens helsetilsyn tok Legemiddelverket over forvaltinga av og tilsynet med forsyningskjeda for legemiddel. Legemiddelverket overtok òg ansvar for å ta opp nye legemiddel på blå resept, ei oppgåve som tidlegare vart utført av Rikstrygdeverket.

I 2013 fekk Legemiddelverket òg oppgåva med å vurdere nytte og kostnader ved nye legemiddel som skal finansierast av spesialisthelsetenesta. For slike legemiddel avgjer dei regionale helseforetaka offentleg finansiering gjennom Nye metodar. I 2018 vart rolla som fag- og tilsynsmyndigheit for medisinsk utstyr overført frå Helsedirektoratet, og i 2019 vart forvaltingsansvaret for elektromedisinsk utstyr overført frå Direktoratet for samfunnssikkerheit og beredskap.

1. januar 2024 bytta Legemiddelverket namn til Direktoratet for medisinske produkt (DMP). Bakgrunnen var at direktoratet fekk fleire oppgåver og større ansvar. tok over ansvaret for blod, celler og vev frå Helsedirektoratet og tok over ansvaret for metodevurdering av medisinsk utstyr og vaksinar og anskaffingar av vaksinar frå Folkehelseinstituttet. I tillegg har DMP fått eit overordna ansvar for forsyningssikkerheit og beredskap for medisinske produkt.

Bakgrunnsstoff

• Offisiell nettstad