Stearin

Frå Wikipedia – det frie oppslagsverket
Gå til: navigering, søk
Den kjemiske strukturen til stearin.

Stearin (tristerin) er eit feittstoff som er fast ved romtemperatur. Det har ikkje lukt eller smak.[1] Det er ein glyserolester av stearinsyre og har formel (C17H35COO)3C3H5. Smeltepunktet er 72 °C.

Ordet «stearin» kjem frå det greske stear som tyder talg. Stearin er ein av dei viktigaste delane av fleire feittypar frå plantar og dyr, som talg og kakaofeitt.[1]

Ein kan framstilla stearing gjennom katalytisk hydrogenering av oljer, eller av stearinsyre og glyserol med Al2O3 til stades.[1]

Stearin var tidlegare den vanlegast brukte komponenten i levande lys. Lys av rein stearin blir for sprøe, derfor blir moderne stearinlys som regel også tilsette fast parafin (parafinvoks). Lys av berre parafin blei for blaute.[2] Stearin kan også brukast som feittkomponent i såpe.

Feittstoffet er framstilt frå levande organismar, for eksempel oljehaldige planteslag som palme, eller som eit biprodukt i kjøtproduksjon. Stearin er glyserinesteret til stearinsyre. Jo meir feitt det er i stearinen, desto fastare er konsistensen i normal romtemperatur.

Kjelder[endre | endre wikiteksten]

  1. 1,0 1,1 1,2 «Stearin: kjemi» (15. februar 2009). Store norske leksikon. Fri artikkel henta 15. juli 2015.
  2. «Stearin: teknikk» (15. februar 2009) Store norske leksikon. Fri artikkel henta 15. juli 2015.