Stig Fredriksson

Stig Fredriksson
Statsborgarskap	Sverige
Fødd	6. mars 1956 (68 år) Sorsele
Idrett	fotball
Utmerkingar	Årets ärkeängel, Kristallkulan

Stig Fredriksson (fødd 6. mars 1956) er ein svensk tidlegare fotballspelar frå Sorsele i Västerbottens län. Han var på 1980-talet forsvarsspelar på IFK Göteborg sitt suksessrike lag.

Karriere

Klubbspel

Fredriksson spelte 1977-81 på Västerås SK, eit lag som deltok i Allsvenskan i 1978-sesongen. Frå 1981 var han aktiv for IFK Göteborg til 1987. Han var såleis med på lagets store triumfar, med finalesigrane i UEFA-cupen som høgdepunkt. Den fyrste kom då det svenske laget slo Hamburger SV med til saman 4 – 0 i 1982, den andre i 1987 då det enda med 2 mot 1 over Dundee United. Fredriksson vart elles firfaldig seriemeister med IFK Göteborg; 1982, 1983, 1984 og 1987. I tillegg vann laget den nasjonale cupturneringa i 1982 og 1983.

Landslagsspel

I tida frå april 1979 til september 1987 aksla Fredriksson den svenske landslagstrøya i 58 kampar. I 15 av kampane var han lagkaptein. Han skåra 2 mål, eitt mot Island og hitt mot Malta.

Kjelder

• Denne artikkelen bygger på «Stig Fredriksson» frå Wikipedia på svensk, den 29. juni 2021.
• eu-football