Svein Fjælberg

Svein Fjælberg
Statsborgarskap	Noreg
Fødd	12. januar 1959 (65 år) Sola kommune
Yrke	fotballspelar
Høgd	183 centimeter
Svein Fjælberg på Commons

Svein Fjælberg (fødd 12. januar 1959) er ein norsk tidlegare fotballspelar frå Sola i Rogaland. Mellom 1979 og 1989 vann han to seriegull og to cupgull med Viking Fotballklubb frå Stavanger. Fjælberg byrja spela for klubben i 1979 og var med på fyrstelaget dei neste elleve sesongane, bortsett frå dei to åra 1987-88 då han gjekk skadd. Han spela 33 landskampar for Noreg i tida 1979-86.

Sidan han la opp som fotballspelar i 1990 har Fjælberg hatt ulike stillingar i Viking FK.

Klubbspel

Fjælberg spela for tredjedivisjons-klubben Sola FK frå 1976 til -78. Før 1979-sesongen vart han overført til Viking for 45 000 kroner, og var så langt Vikings dyraste signering. Allereie i sin fyrste sesong vart han dobbeltvinnar då klubben vann både seriemeisterskapen og cupmeisterskapen, den siste etter siger i finalen med 2-1 over Haugar.

Fjælberg vann sitt andre seriegull med Viking i 1982-sesongen. Året etter vart han kåra til «Årets spelar» i Noreg. I 1984 spela han sin andre NM-finale då Viking møtte Fredrikstad Fotballklubb. Etter uavgjort i den fyrste finalekampen, måtte Viking reise heim med tap etter omkampen.

Ved sesongslutt 1986 rykte Viking ned i andre-divisjon, men Fjælberg spela nesten ikkje dei to åra klubben deltok i den divisjonen. Han var mykje plaga av skader, men kjempa seg tilbake då klubben atter spela i den norske toppdivisjonen i 1989. Viking slo seg det året fram til ny NM-finale. Der møtte klubben Molde FK. Som i 1984 vart det omkamp etter uavgjortresultat i fyrste finalekampen. I den andre finalekampen sigra Viking 2-1, med Fjælberg som kaptein og kongepokalvinnar i sin siste kamp før han la opp.

Landslagsspel

Fjælberg debuterte på det norske landslaget 26. september 1979 mot Vest-Tyskland i ein kvalifiseringskamp til sommar-OL 1980. Han var med på Noregs lag som deltok i fotballturneringa under sommar-OL 1984 i Los Angeles. 24. september 1986 spela han sin 33. og siste landskamp då Noreg møtte DDR i ein EM-kvalifiseringskamp.

Merittar

• Seriemeister med Viking 1979 og 1982
• Cupvinnar med Viking 1979 og 1989
• NM-sølv i cupen med Viking 1984

Kjelder

• Denne artikkelen bygger på «Svein Fjælberg» frå Wikipedia på engelsk, den 6. oktober 2012.