Terceira

Terceira
Serra de Santa Bárbara
Geografi
Stad	Atlanterhavet
Koordinatar	38°44′N 27°19′W
Øygruppe	Asorane
Areal	396,75 km²
Høgaste punkt	Santa Bárbara (1023 moh.)
Administrasjon
Land	Portugal
Autonom region	Asorane
Største busetnad	Angra do Heroísmo (35 581 innb.)
Demografi
Folketal	54 996
Folketettleik	140 /km²

Terceira (portugisisk Ilha Terceira) er ei øy i Asorane i Portugal med eit areal på 396,75 km². Øya har ei lengd på 29 km og er 18 km på det breiaste. Omkrinsen er 90 km og ho har om lag 55 000 innbyggjarar.

Geografi og geologi

Terceira består av fire overlappande stratovulkanar over ei geologisk rift kalla Terceirarifta. Vulkanen stig frå eit djup på over 1500 meter under havet i Atlanterhavet. Den eldste vulkanen er over 300 000 år gamal og heiter Cinquo Picos. Denne dannar den austlege delen av øya med ein kaldera med diameter på 7 km, som er det største på Asorane. Den nest eldste er om lag 100 000 år gammal og er Guilherme Moniz sør på øya. Denne har òg ein kaldera der kanten av krateret er 623 meter over havet. Like nord for denne ligg Pico Alto, som truleg er mindre enn 60 000 år gammal. Han hadde ein gong ein kaldera òg, men denne er fylt att med fleire mindre lavadomar og kjegler med ei høgd på opp til 808 meter over havet.

Den yngste og einaste historisk aktive vulkanen er Santa Bárbara, som utgjer den vestlege delen av øya. Det høgaste punktet er 1023 meter over havet. Denne stratovulkanen har to kalderaer, og den yngste av desse er om lag 15 000 år gammalt. Historiske utbrot skjedde i 1761 langs ei sprekk på austsida av vulkanen og i 1867 og 1998–2000 frå undersjøiske ventilar utanfor vestkysten. Den vestlege delen av Treceira er meir skogkledd enn den austlege delen på grunn av vedvarande vestavind som gjev nedbør på denne sida.

Det meste av øya er omgjeve av kystklipper på om lag 20 meter, bortsett frå sørkysten nær Angra do Heroísmo. Her danna eit utbrot av basaltisk lava i grunt vatn ein tuffkjegle kalla Monte Brasil, som vernar hamna til hovudbyen på øya. Kjegla har ein diameter på 1 km og stig 205 meter over havet på vestsida av hamna.

Samfunn og økonomi

Terceira er delt inn i kommunane Angra do Heroísmo og Praia da Vitória. Angra do Heroísmo, den historiske hovudstaden på Asorane, er den eldste byen på Asorane med ei historie som går tilbake til 1534. Det historiske sentrumet i byen er på verdsarvlista til UNESCO.

Hovudnæringa til Terceira er kvegdrift og mjølkeprodukt. Øya har to hamner ved Angra do Heroísmo og Praia da Vitória og ein militær flybase.

Historie

Det tidlegare namnet på Terceira var Brazil. Etter kvart som øya vart meir kjend og kolonisert vart namnet endra til Terceira (som tyder «den tredje» på portugisisk, som i «den tredje øya»).

Ei årleg hending som vert halde kvar dag frå 1. mai til 30. september er tourada à corda (tyrefekting med tau). Det består av å sleppe ein okse, knytt fast til eit tau, laus i gatene der nokon drar i taua og andre utfordrar oksen. Touradas kan verte halde opp til tre gonger om dagen.

16. mars 2003 møttest George W. Bush, president i USA, Tony Blair, statsminister i Storbritannia, José María Aznar, statsminister i Spania og José Manuel Barroso, statsminister i Portugal, på Terceira for å diskutere invasjonen av Irak som starta fire dagar seinare, 20. mars.

• 
  Angra do Heroísmo
• 
  Kart over Terceira
• 
  Satellittbilete av Terceira
• 
  Nær Praia da Vitória

Kjelder

• Denne artikkelen bygger på «Terceira Island» frå Wikipedia på engelsk, den 22. juni 2008.
  • Wikipedia på engelsk oppgav desse kjeldene:
• Scarth, Alwyn og Tanguy, Jean-Claude (2001). Volcanoes of Europe. Oxford University Press. s. 243. ISBN 0-19-521754-3.  CS1 maint: Multiple names: authors list (link)
• Global Volcanism Program: Terceira Arkivert 2008-06-23 ved Wayback Machine.

Bakgrunnsstoff

• Azores.com, ei kommerisiell side med mykje informasjon om Terceira