Teutoburgerskogen

Teutoburgerskogen
område
Land	Tyskland
Teutoburgerskogen 51.895555555556°N 8.8136111111111°E / 51.895555555556; 8.8136111111111
Wikimedia Commons: Teutoburg Forest

Teutoburger Wald, på norsk også kalla Teutoburgerskogen, er eit høgdedrag som strekkjer seg i nordvest-søraustleg retning gjennom den tyske delstaten Nordrhein-Westfalen. Det stig frå Dortmund-Ems-kanalen i nærleiken av Osnabrück, og endar nordaust for Paderborn.

Den samla lengda på fjellryggen er ca. 110 km. Terrenget er svakt stigande mot søraust, og i sør går Teutoburger Wald over i Eggegebirge, som er gjennomgåande høgare. Berggrunnen er for det meste kalk- og sandstein, og ryggen er dekt av lauvskog.

Store delar av Teutoburger Wald blir omfatta av to ulike naturparkar. Der Naturpark Nördlicher Teutoburger Wald-Wiehengebirge ligg i nordvestlege Teutoburger Wald og Wiehengebirge mellom Bielefeld og Osnabrück, medan Naturpark Teutoburger Wald / Eggegebirge strekkjer seg frå Bielefeld til Diemeldalen.

Slaget ved Teutoburgerskogen

Hermannsdenkmal

På høgda Grotenburg sørvest for regionshovudstaden Detmold står det 53 m høge minnesmerket Hermannsdenkmal. Det er sett opp til minne om den germanske hærføraren Hermann (Arminius), som i år 9 e.Kr. knuste tre romerske legionar i slaget ved Teutoburgerskogen.

Åstaden for slaget er aldri sikkert påvist. Nyare arkeologisk forsking tyder på at slaget kan ha funne stad eit godt stykke nord for dagens Teutoburger Wald, i Wiehengebirge ved høgda Kalkriese, litt nord for Osnabrück og litt søraust for Bramsche.

Etter det skakande nederlaget bestemde den romerske keisaren Augustus seg for at grensene til Romarriket ikkje skulle gå lenger enn Rhinen i nord og Donau i aust.

Kjelder

• Denne artikkelen bygger på «Teutoburger Wald» frå Wikipedia på bokmål, den 18. mai 2025.

Litteratur

• Fritz Mielert: Urväterland. (Teutoburger Wald) L. Holzwarth-Verlag, Bad Rothenfelde 1927

Bakgrunnsstoff

Commons har multimedium som gjeld: Teutoburgerskogen