Thorstein Fretheim den yngre

Thorstein Fretheim den yngre
Fødd	26. februar 1867 Ådal kommune
Død	9. februar 1927 (59 år)
Statsborgar av	Noreg
Parti	Venstre
Yrke	politikar, prest
Ektefelle	Helga Fretheim
Alle verv	stortingsrepresentant (1913–1915) stortingsrepresentant (1916–1918)

Thorstein Fretheim (26. februar 1867–9. februar 1927) var ein norsk prest, skulemann og Venstre-politikar. Han var stortingsrepresentant for Akershus frå 1913 til 1918.

Fretheim var fødd i Ådal i Buskerud, der far hans var lærar, men voks for ein del opp på Eidsvoll. Han vart student i 1887 og cand. theol. i 1893, tok den praktisk-teologiske eksamen i 1895. Året etter tok han eksamen i samisk. Tida 1893-97 underviste han på ulike skular. I 1897 reiste han til Wisconsin i USA for å arbeide som prest ved norske evangelisk-lutherske kyrkjelydar. Frå 1901 var han tilbake i Noreg, og virka som kallskapellan i Vanse fram til 1903. Dei nest fem åra var han hjelpeprest i Østerdalens fjelldistrikt, residerande kapellan i Nes i Akershus frå 1909. Seinare var han sokneprest i Idd, Halden og Kråkstad.

Fretheim sat to periodar på Stortinget. Han var medlem i kyrkjekomiteen både i 1913-15 og 1916-18, den siste perioden også som komitéleiar. Fretheim var også involvert i lokalpolitikken i både Vanse, Rendalen, Nes i Akershus og Idd. Han var anten medlem av heradsstyret eller skulestyret. Elles var han formann i ei rekke foreiningar.

Kreftsjuk døydde Fretheim i 1927 i Kråkstad.

Kjelder

• Lindstøl, Tallak: Stortinget og Statsraadet 1814-1914. Kristiania, 1914

Bakgrunnsstoff

• Biografisk informasjon om Thorstein Fretheim den yngre NSD Norsk senter for forskningsdatas politikararkiv