Tjukknebbpirol

Tjukknebbpirol
Tjukknebbpirol
Status
Status i verda: Sårbar
Systematikk
Underrekkje:	Virveldyr Vertebrata
Klasse:	Fuglar Aves
Underklasse:	Neognathae
Overorden:	Neoaves
Orden:	Sporvefuglar Passeriformes
Familie:	Pirolfamilien Oriolidae
Slekt:	Pirolar Oriolus
Art:	Tjukknebbpirol O. crassirostris
Vitskapleg namn
Oriolus crassirostris Hartlaub, 1857

Tjukknebbpirol (Oriolus crassirostris) er ein mellomstor sporvefugl og ein medlem av pirolfamilien som er endemisk for øya São Tomé utanfor Gabon i Afrika.

Epitetet av det vitskaplege namnet crassirostris er latin og ei samansetting av crassus 'tjukk' eller 'tung'; rostris 'nebba'.

Skildring

Denne pirolen har ei meir fargelaus fjørdrakt enn slektningane på fastlandet, og det brunraude nebbet er meir solid enn vanleg i slekta Oriolus. Hos hannar er hovudet og brystet svart, oversida er skittengrøn, undersida er lys grå med mørke strek. Han har òg ein svak, lys krage. Hoa er mindre kontrastrik med bleikare hovud og mørke strek på kinnet og nedover kroppssidene. Kroppslengda er ca. 23–24 centimeter.

Tjukknebbpirolar lever i skogshabitat, og held seg vekke frå plantasjar. Dei beiter einslege eller parvis i opp til 1600 moh. på frukt, frø og virvellause dyr. Dei kan vere med i fleirartsflokkar. Lætet er sett saman av varierande fløytetonar.

Storleiken på populasjonen er estimert til å ligge mellom 2500 og 10 000 individ og er trudd å vere minkande grunna øydelegging av det naturlege leveområdet på øya. Derfor blir status for arten vurdert som sårbar (VU) av IUCN.

Kjelder

• Walther, B. og P. Jones (2020). Sao Tome Oriole (Oriolus crassirostris), version 1.0. I Birds of the World (J. del Hoyo, A. Elliott, J. Sargatal, D. A. Christie, og E. de Juana, red). Cornell Lab of Ornithology, Ithaca, NY, USA. https://doi.org/10.2173/bow.satori1.01

Referansar

Bakgrunnsstoff

Commons har multimedium som gjeld: Tjukknebbpirol