Tomatsuppe

Ei skål tomatsuppe

Tomatsuppe er ei suppe med tomat som hovudingrediens. Ho finst i mange ulike variantar, med ei rekkje moglege tilleggsingrediensar. Ein kan laga tomatsuppe med ferske tomatar som er mogne eller grøne, av tomatar på boks og eventuelt tomatpuré eller passata. Det finst også ulike pulver, kubar og hermetikk av slike supper som ein kan blanda ut med vatn eller som er klare til servering. Ulike tomatsupper kan serverast varme eller kalde, eller kan brukast som ingrediens i andre rettar. Nokre kjende kalde tomatsupper er gazpacho og salmorejo.

Tidlege britiske oppskrifter på «Tomato Soup» var i røynda grønsaksupper der ein også nytta tomat. I løpet av 1800-talet blei tomatane ein viktigare ingrediens i slike supper. I Nord-Amerika fekk ein nye oppskrifter frå slutten av 1800-talet av, med glatte supper eller tomatsupper med tilleggsingrediensar som mjølk, fløyte eller ris. Ved byrjinga av 1900-talet var tomatsuppe ei favorittsuppe i USA. Det blei selt hermetiske tomatsupper frå slutten av den amerikanske borgarkrigen. Campbell Soup Company introduserte si suksessrike hermetiske tomatsuppe i 1897.

Bakgrunnsstoff

Commons har multimedium som gjeld: Tomatsuppe