Tony Williams

Frå Wikipedia – det frie oppslagsverket
Tony Williams

Fødd12. desember 1945
FødestadChicago
Død23. februar 1997 (51 år)
DødsstadDaly City
FødenamnAnthony Tillmon Williams
OpphavUSA
Aktiv1961–1997
Sjangerjazz
Instrumenttrommesett
PlateselskapBlue Note
Verka somtrommeslagar, jazzmusikar, regissør

Tony Williams (12. desember 194523. februar 1997) var ein amerikansk jazztrommeslagar.

Williams voks opp i Boston, der han tok timar hjå trommeguruen Alan Dawson frå ein ung alder. Allereie tidleg i tenåra hadde han spelejobbar kring byen, og han vart fast medlem i Jackie McLean sitt band som syttenåring. Nokre månader seinare vart han med i Miles Davis sin kvintett, med Herbie Hancock, Ron Carter og Wayne Shorter. Dette bandet stod heilt sentralt i utviklinga av jazzmusikken i 1960-åra, og tromminga til Williams var ein essensiell del av lydbiletet. I denne tida spelte rytmeseksjonen også inn plater utan Davis, og Williams var i tillegg med på den klassiske Eric Dolphy-utgjevinga «Out to Lunch».

Den pur unge trommeslagaren fekk, saman med Elvin Jones, æra for å føre jazztromminga vidare frå bop-stilen som Kenny Clarke og Max Roach hadde utvikla dei føregåande tiåra. Dei viktigaste endringane i høve til den eldre stilen gjekk ut på måten dei braut opp pulsen og det tradisjonelle swingmønsteret ved mellom anna å bruke polyrytmiske figurar og ved å endre måten hihaten vart nytta i kompinga. Williams vart kjent for å kunne spele særs høglytt og med enorme tekniske ferdigheiter, og han hadde eit repertoar av improvisasjonsidear tilsynelatande utan grenser. Stilen dei skapte, har halde seg som den viktigaste tradisjonen i måten moderne jazztrommer vert spelt i dag.

Williams heldt fram med Davis til 1969, då han grunnla Life Time-trioen med gitaristen John McLaughlin og organisten Larry Young. Bandet har seinare vorte omtala som det første store fusion-bandet. Etter dei hadde spelt inn tre plater som fekk varierande mottaking, braut bandet opp. Williams heldt fram ei stund i trioformatet saman med gitaristen Alan Holdsworth. Han forsvann så frå rampelyset nokre år, før han mot slutten av 1970-åra på nytt spelte med den gamle rytmeseksjonen til Davis i bandet V.S.O.P. I midten av 1980-åra starta han eit nytt band, som spelte inn plater og turnerte fram til han uventa døydde i 1997, som fylgje av ein hjarteinfarkt under ein operasjon.

Bakgrunnsstoff[endre | endre wikiteksten]