Valentin Valentinsen

Frå Wikipedia – det frie oppslagsverket
Hopp til navigering Hopp til søk

Valentin Valentinsen (fødd 21. desember 1861) var ein maskinkonstruktør og stortingsmann frå Haugesund. Han representerte Venstre.

Valentinsen var son til ein skipsreiar. Sjølv gjekk han maskinlinja ved Trondhjems tekniske skole og arbeidde frå 1882 ved Martens Olsens skipsverft i Laksevåg. Der vart han seinare maskinkonstruktør. År 1887 var han sjef på maskinavdelinga til eit privateigd verft i Nikolajev i Sør-Russland, eit verft som bygde krigsskip. Etter ei studiereise til fem europeiske land var han leiande maskinkonstruktør ved skipsverftet Palmer i Jarrow-on-Tyne i England. Året etter var han først anleggsingeniør ved Crane Brothers i Chicago og sidan leiande konstruktør for krigsmaskineri ved Union Iron Works' i San Francisco i USA. I 1893 slo han seg ned i Noreg der han levde som teknisk konsulent på fleire felt, så som vasskraft- og elektrisitetsanlegg, samt bygging av fabrikkar og skip.

Valentinsen busette seg i Haugesund i 1901, der han frå 1904 til -10 var medlem av bystyret. Han var varaordførar 1908 og ordførar 1909, samt 1915-16. Valentinsen var Haugesund sin representant på Stortinget i tida 1910-15. Begge valperiodane var han medlem av næringskomite nr 1, nestformann frå 1913. Bolken 1910-12 var han også medlem av reguleringskomiteen.

Kjelder[endre | endre wikiteksten]