Wilhelm Meisterlin

Frå Wikipedia – det frie oppslagsverket
Wilhelm Meisterlin

Statsborgarskap Noreg
Fødd 31. mars 1878
Trondheim
Død

16. mars 1954 (75 år)
Oslo

Yrke forretningsdrivande

Wilhelm Meisterlin (31. mars 187816. mars 1954) var ein norsk forretningsmann og luftfartspioner frå Trondheim. Han var ein pioner i norsk ruteflyging og bidrog aktivt til at Noreg fekk si fyrste internasjonale flyrute i 1927.

Meisterlin var son til ein bankmann. Etter eksamen ved Trondhjems Tekniske Læreanstalt i 1897 reiste han til Sør-Afrika, der han deltok i boerkrigen som britisk offiser. Åra 1902-05 heldt han fram i det militære i Transvaal, til han så starta opp ei forretning i Johannesburg som selde utstyr til gruveindustrien. I 1908 avvikla han verksemda i Sør-Afrika og reiste tilbake til Noreg og etablerte seg i Kristiania med agentur for britisk stål og maskinvare.

Som agent for flyfabrikken Handley Page organiserte Meisterlin i august 1919 den fyrste passasjerflyging frå Storbritannia, via Nederland og Danmark, til Kjeller med eit ombygd bombefly. I 1927 etablerte han Norske Luftruter A/S, og vart agent for Deutsche Luft Hansa. Same sommaren opna det tyske selskapet den fyrste permanente flyruta på Noreg.

Meisterlin søkte i 1934 konsesjon på flyruter i Noreg, men konsesjonen gjekk til Det Norske Luftfartselskap, eit nyskipa firma kontrollert av det pengesterke skipsreiarlaget Fred. Olsen. Samstundes mista Meisterlin Lufthansa-agenturet.

Meisterlin var styremedlem i Norsk Luftseiladsforening, selskapet som organiserte polferdene med flybåtane N-24 og N-25 i 1925, og luftskipet Norge i 1926. Han var elles den fyrste formannen i Norsk Aero Klubb etter avdøde Roald Amundsen.

Kjelder[endre | endre wikiteksten]