Hanni Wenzel

Frå Wikipedia – det frie oppslagsverket
Gå til: navigering, søk
Hanni Wenzel
Hanni Wenzel 1979 Paraguay stamp.jpg
Hanni Wenzel på frimerke frå Paraguay, 1979
Fødd 14. desember 1956
Straubing
Hanni Wenzel på Commons

Hannelore Wenzel, kjend som Hanni Wenzel, (fødd 14. desember 1956) er ein tidlegare alpinist frå Liechtenstein, som vann verdscupen i alpine greiner i 1978 og 1980. Ho vann to gullmedaljar under Vinter-OL 1980 i Lake Placid, og vart verdsmeister i slalåm i St. Moritz i 1974.

Hanni Wenzel er fødd i Straubing i Tyskland. Då ho var eitt år gammal flytta familien til fyrstedømmet Liechtenstein, der familien etter ei tid fekk liechtensteinsk statsborgarskap. 17 år gammal vart Wenzel verdsmeister i slalåm i 1974, og fekk sølv i kombinasjonen. To år seinare tok ho under Vinter-OL i Innsbruck Liechtensteins aller fyrste olympiske medalje, ein bronsemedalje. I tillegg fekk ho i Innsbruck ein VM-bronse i kombinasjonen.

Med ein sølvmedalje i kombinasjonen tok Wenzel under VM i alpine greiner 1978 i Garmisch-Partenkirchen ein medalje i øvinga for tredje gong på rad. Ho vart så olympisk meister både i slalåm og storslalåm under vinterleikane 1980 i Lake Placid, og tok i tillegg sølv i utfor. Under dei same leikane vann også broren Andreas Wenzel ein sølvmedalje.

Wenzel vann verdscupen i alpine greiner 1978, og på ny i 1980. Sesongane 1975, 1979, 1983 og 1984 kom ho på andreplassen i verdscupen. Mellom desember 1973 og mars 1984 vann ho 33 verdscuprenn, flest i storslalåm og slalåm, høvesvis 12 og 11. 89 gongar stod ho på sigerspallen etter renn i verdscupen.

Hanni Wenzel er gift med alpinisten, austerrikaren Harti Weirather, og mor til alpinisten Tina Weirather.

Kjelder[endre | endre wikiteksten]

  • Sportsboken, aktuelle årgangar