Italiensk salat

Frå Wikipedia – det frie oppslagsverket

Italiensk salat er i norsk tradisjon ein salat av strimla grønsaker og kjøt i majones. Han blir mykje brukt som pålegg.[1]

Namnet skal koma frå at salaten inneheld dei tre fargane i det italienske flagget. Ein dansk variant av italiensk salat inneheld «raud» gulrot, grøne erter og kvit majones.[2]

Historie[endre | endre wikiteksten]

Det finst norske oppskrifter på italiensk salat frå 1830-talet av. Ei oppskrift frå 1833 inneheld «Spegepølse i tynde Skiver, [...], Citronskiver, som Skallen og Kjærnerne ere tagne fra, [...] Østers, Oliven, Capers, hakkede Anschovis, Eddik, Olive og Peber.»[3] Ei oppskrift frå 1846 inneheld kalkun eller høns i strimlar, asparges, potet, reker, oliven og kapers. Dressingen er laga av kokt eggeplomme, sukker, sennep, fløyte og eventuelt olje, eddik og madeiravin. Salaten blir pynta med karse, reker, oliven, raudbete og ansjos i strimlar.[4]

Ei oppskrift på italiensk salat frå 1920 minnar meir om russisk salat med kokte, kalde grønsaker som gulrot, selleri og persillerot skorne i terningar, tilsett grøne erter og majonessaus og pynta med salat, persille eller karse.[5] Kolde anretninger til frokost- og aftensbordet av Hedvig Irgens frå 1926 har fleire oppskrifter på italiensk salat, to med strimla ingrediensar og to med terningar.[6]

Seinare er italiensk salat særleg blitt kjend som eit ferdig produkt ein kan kjøpa i butikkar. Delikat Fabrikker (no del av Mills) hadde italiensk salat som sitt største produkt.[7] Delikat-salaten er laga av kål og gulrot i strimlar med ei dressing av mellom anna majones,[8] og minner mykje om coleslaw.

Sjå òg[endre | endre wikiteksten]

Kjelder[endre | endre wikiteksten]

  1. «italiensk salat». Store norske leksikon (på norsk bokmål). 28. august 2019. 
  2. «Hva' f..... er meningen med italiensk salat». Fyens Stiftstidende. Arkivert frå originalen 2016-03-05. 
  3. Nyeste Kogebog. Trykt i det Lehmannske Officin. 1833. s. 61. 
  4. 544 veiledende Opskrifter i Kogekunsten, til Brug saavel i store som smaae Huusholdninger. Paa Forfatterindens Forlag. Trykt hos Carl A. Caudrio. 1846. s. 108. 
  5. Christensen, Dorothea (1920). Husstell for fortsettelsesskoler, ungdomsskoler, vandrekjøkkener og skolekjøkkenkurser for voksne elever i by og bygd. Kristiania: Aschehoug. s. 91. 
  6. Irgens, Hedvig (1926). Kolde anretninger til frokost- og aftensbordet. Oslo: Cappelen. s. 21. 
  7. Made in Drammen. Drammen Rotary. 2011. s. 337. ISBN 9788230317259. 
  8. «Hemmeligheten bak sprø og saftig italiensk salat», Mills AS (på norsk bokmål), henta 2. november 2021