Abdoulaye Wade

Abdoulaye Wade
Statsborgarskap	Senegal
Fødd	29. mai 1926 (97 år) Kébémer
Yrke	politikar, jurist, deltakar i internasjonale forum
Språk	fransk
Verv	President i Senegal
Periode	2000-2012
Føregangar	Abdou Diouf
Etterfylgjar	Macky Sall
Politisk parti	Parti démocratique sénégalais
Religion	Muridism, Sunniislam
Ektefelle	Viviane Wade
Abdoulaye Wade på Commons

Abdoulaye Wade med George W. Bush i 2003.

Abdoulaye Wade (fødd 29. mai 1926) var president i Senegal frå 1. april 2000 til 2. april 2012. Han leiar det liberale partiet Parti Démocratique Sénégalais (Det senegalesiske demokratiske partiet), som er medlem av Den liberale internasjonale. Han var i fleire tiår opposisjonsleiar og har både vore fengsla og i eksil.

Wade stilte for første gong som presidentkandidat i februar 1978 mot president Léopold Sédar Senghor, og fekk 17,4 % av røystene. Han stilte igjen i 1983, 1988 og 1993, og kom kvar gong på andre plass, bak president Abdou Diouf. I februar 2000 kom han igjen på andre plass i første runde av presidentvalet, men sidan ingen kandidatar fekk reint fleirtal vart det ein andre valomgang 19. mars. Wade vann med 58,5 % av røystene. Han vart president 1. april same året.

Det første året som president måtte Wade samarbeida med eit sosialistisk fleirtal i nasjonalforsamlinga. I 2001 fekk partiet hans fleirtal i parlamentsvalet. Etter ei ny grunnlov som vart vedtatt i 2001 vart presidentperioden redusert frå sju til fem år, frå og med neste presidentperiode. I desember 2004 vart det skrive under ein fredsavtale som skulle gjera slutt på tjue år med krig i Casamance-regionen sør i Senegal. Wade har kome under kritikk frå menneskerettsorganisasjonar som Amnesty International for trakassering og trugsmål mot journalistar og opposisjonelle.

Ved presidentvalet i 2007 vann Wade, som kandidat for Det senegalesiske demokratiske partiet, ein klar siger i første runde, med 55.9 % av stemmane.