Carl Fredrik Bunæs
| Carl Fredrik Bunæs | |
| Fødd | 16. oktober 1939 (82 år) Drammen |
| Yrke | friidrettsutøvar |
Carl Fredrik Bunæs (fødd 16. oktober 1939) er ein norsk tidlegare friidrettsutøvar, fødd i Drammen. Fyrste halvdelen av 1960-åra var han i aller fremste rekke mellom sprintarane i Norden, han vann då fire nordiske meisterskapstitlar. I tiåret 1957-66 vart han 18 gongar norsk meister på sprintdistansane 100 meter (5), 200 meter (9) og 400 meter (4). Han var medlem av IK Tjalve.
Aktiv[endre | endre wikiteksten]
Bunæs vann si fyrste gullmedalje i ein noregsmeisterskap og sette sin fyrste noregsrekord allereie i sitt 18. år. Begge prestasjonane kom på det som ein må kalle spesialdistansen, 200 meter. Her fekk han notert 21,3 sekundar i 1957, ein rekord som hans sterkaste konkurrent, Bjørn Nilsen tok over med fyrst 21,2 og så 21,1 i 1958. Bunæs tok tilbake rekorden i 1959, då han vart klokka inn på 21,0.
I 1960 vann Bunæs 200-meteren på tida 20,9 sekundar under ein landskamp i Karlstad, både norsk og nordisk rekord. Same sesongen forbetra han den norske 400-meterrekorden til 47,3 og han vart under NM 1960 tildelt kongepokalen for sin dobbeltsiger, 100 m og 200 m, sistnemnde distanse på ny meisterskapsrekord. Han deltok også i Sommar-OL 1960 i Roma, der han vart utslått i kvartfinalane på både 200 m (21,4 =nr 17) og 100 m (10,5 =nr 15).
Tre nordiske friidtettsmeisterskap vart arrangert i tida 1961-65. Bunæs vann i 1961 både 100 meter og 200 meter, i 1963 sigra han på 100 m, medan han i 1965 vart nordisk meister på 400 meter. Som 400-meterløpar nådde han toppen i 1963-sesongen, då han på Bislett stadion flytta noregsrekorden til 47,1 og deretter til 46,6.
Bunæs var ein framifrå poengplukkar for Noreg i landskampane. I sine 41 landskampar stod han på startstreken 130 gongar, 96 gongar kom han i mål som vinnar. Med IK Tjalve sine stafettlag vann han heile 26 NM-gull.
Medaljar i norske meisterskap[endre | endre wikiteksten]
- 1956: Bronsemedalje på 100 m – 10,7
- 1957: Gullmedalje på 200 m – 21,3, og bronsemedalje på 100 m – 10,8
- 1959: Gullmedaljar på 100 m – 10,5, og på 200 m – 21,6
- 1960: Gullmedaljar på 100 m – 10,6 og på 200 m – 21,2. Kongepokal.
- 1961: Gullmedaljar på 100 m – 10,6 og på 200 m – 21,6
- 1962: Gullmedaljar på 100 m – 10,8 og på 200 m – 21,6
- 1963: Gullmedaljar på 100 m – 10,5, 200 m – 21,2, og 400 m – 48,3
- 1964: Gullmedaljar på 200 m – 21,7, og 400 m – 48,3, samt sølvmedalje på 100 m – 10,7
- 1965: Gullmedaljar på 200 m – 21,2, og 400 m – 47,7
- 1966: Gullmedaljar på 200 m – 21,4, og 400 m – 47,5
Kjelder[endre | endre wikiteksten]
- Magnus Breili: Sport i navn & tall. 1971
- friidrett.no