Choe Ryong-hae
| Choe Ryong-hae | |||
.jpg) | |||
| Fødd | 15. januar 1950 (74 år) Sinchon | ||
|---|---|---|---|
| Statsborgar av | Nord-Korea | ||
| Parti | Det koreanske arbeidarpartiet | ||
| Yrke | politikar | ||
| Utdanna ved | Kim Il-sung-universitetet | ||
| Far | Choe Hyon | ||
| Alle verv |
| ||
Choe Ryong-hae (fødd 15. januar 1950) er ein nordkoreansk politikar og offiser som har vore formann for den ståande komiteen til den øvste folkeforsamlinga i Nord-Korea sidan 11. april 2019. Han er også, frå same dato, fyrste viseformann i Statskomiteen der Kim Jong-un er leiar.[1] Han er også viseformann og medlem av presidiet i Politbyrået i Det nordkoreanske arbeidarpartiet. I tillegg har han vore nestkommanderande i militærkommisjonen til partiet, etter leiaren Kim Jong-un.[2] Han er rekna som nummer tre i makthierarkiet i Nord-Korea, etter Kim Jong-un og statsminister Kim Tok-hun.[3]
Biografi[endre | endre wikiteksten]
Choe Ryong-hae blei fødd 15. januar 1950 i Sinchon i provinsen Sør-Hwanghae. Han er son av Choe Hyon, som kjempa saman med Kim Il-sung som geriljasoldat tilknytta Den nordaustlige anti-japanske arméen i Mandsjuria etter den japanske okkupasjonen i 1931. Choe Hyon fungerte seinare også som forsvarsminister i Nord-Korea. Choe Ryong-hae tilhøyrer dimed andre generasjons revolusjonære, noko som gir høg status blant nordkoreanarane.[4] Han gjekk inn i Den koreanske folkearméen i 1967, og han har studert politikk og økonomi ved Kim Il-sung-universitetet.[5]
Politisk karriere[endre | endre wikiteksten]
Choe byrja sin politiske karriere som politisk instruktør for det nordkoreanske arbeidarpartiet ved Kim Il-sung-universitetet i 1970.[4] Han steig i gradene innanfor det sosialistiske ungdomsforbundet til Kim Il-sung, der han blei viseformann i 1981 og formann i 1986. Frå 1986 var han også representant i Den øvste folkeforsamlinga, medlem av presidiet og medlem av sentralkomiteen. I 1990-åra leia han også det nasjonale fotballforbundet og det nasjonale taekwondoforbundet.[4] Han mista posisjonen sin i januar 1998 etter skuldingar om salsverksemd mot utlandet utan tillating. Han skal ha blitt teken til nåde etter at systera til Kim Jung-il greip inn til hans fordel og etter å ha gjennomgått omskulering.[6][7] Choe gjorde seg ikkje merka innan leiarskapet i landet før Kim Jong-il sin død i desember 2011. Han blei då sett på som ein nøkkelperson og støttespelar i maktovertakinga til Kim Jong-un. I april 2012 fekk han ei rekkje høge leiarverv; han blei utnemnd til chosu (den nest høgaste militære offisersgraden i Nord-Korea, tilsvarande ein posisjon mellom marskalk og general), medlem av politbyrået i partiet, viseformann i militærkommisjonen, sjef for det politiske byrået for Den koreanske folkearméen (som utgjer den politiske kontrollen med dei militære styrkane, underlagd forsvarsdepartementet) og medlem av den nasjonale forsvarskommisjonen.[8]
På eittårsdagen for Kim Jong-il sin død 16. desember 2012 var Choe iført generalsuniform, mens han to dagar tidlegare var iført visemarskalkuniforma.[9] I april 2014 blei han utnemnd til fyrste viseformann i Den nasjonale forsvarskommisjonen, noko som igjen styrka hans posisjon som nummer to i hierarkiet, men han blei deretter erstatta av visemarskalk Hwang Pyong-so som leiar for politbyrået til partiet.[10]
I januar 2015 blei det meldt at den nest eldste sonen til Choe, Choe Song, hadde gifta seg med systera til Kim Jong-uns, Kim Yo-jong.[11]
I 2017 blei Choe vald inn i den sentrale militærkommisjonen til partiet.[12]
I oktober 2017 blei Choe utnemnd til leiar for organisasjons- og rettleiingsavdelinga i partiet. Før Choe blei utnemnd hadde denne posisjonen lenge vore atterhalden Kim-familien. Hans forgjengar i stillinga var Kim Jong-un.[7]
I april 2019 blei Choe president i Den øvste folkeforsamlinga.[1]
Sanksjonar[endre | endre wikiteksten]
I desember 2018 sette USA i verk sanksjonar mot Choe og to andre nordkoreanske leiarar på grunn av mistanke om brot på menneskerettane og sensuraktivitetar.[13][2]
Familie[endre | endre wikiteksten]
Det er kjent at Choe har to søner og ei dotter.[14]
Kjelder[endre | endre wikiteksten]
- ↑ 1,0 1,1 «N.K. leader re-elected as chairman of State Affairs Commission». Yonhap News Agency. 12. april 2019.
- ↑ 2,0 2,1 «Treasury Sanctions North Korean Officials and Entities in Response to the Regime's Serious Human Rights Abuses and Censorship». U.S. Department of the Treasury.
- ↑ «North Korea's premier now ranks as top official. Is he Kim Jong Un's successor?». NK PRO. 1. august 2022.
- ↑ 4,0 4,1 4,2 «Choe Ryong Hae (Ch'oe Ryong-hae)». North Korea Leadership Watch. 23. februar 2018.
- ↑ «Brief History of Member of Presidium, Members and Alternate Members of Political Bureau of C.C., WPK Elected to Fill Vacancies». Korean Central News Agency. 11. april 2012.
- ↑ «14th meeting of Kim Il Sung Socialist Youth League CC held». Korean Central News Agency. 26. januar 1998.
- ↑ 7,0 7,1 «Choe Ryong Hae to OGD? [revised 13 JAN 2018]». North Korea Leadership Watch. 13. januar 2018.
- ↑ Ottens, Nick (13. april 2012). «Kim Jong-un Indispensable to North Korean Regime». Atlantic Sentinel.
- ↑ «Choe Ryong Hae Taken Down a Peg?». North Korea Leadership Watch. 16. desember 2012.
- ↑ Grisafi, John G. (3. mai 2014). «Choe Ryong Hae not purged, but no longer No. 2». NK News.
- ↑ «Kim Jong Un's Little Sister Married Son of Top Regime Official, Report Says». The Wall Street Journal. 2. januar 2015.
- ↑ «Choe Ryong-hae elected to N.K. ruling party's central military commission». Yonhap News Agency. 8. oktober 2017.
- ↑ Morin, Rebecca (10. desember 2018). «U.S. sanctions 3 senior North Korean officials». Politico.
- ↑ «NK leader's sister weds son of Choe Ryong-hae: sources». Yonhap News Agency. 2. januar 2015.
- Denne artikkelen bygger på «Choe Ryong-hae» frå Wikipedia på bokmål, den 3. oktober 2023.