Dyrøya i Dyrøy

Dyrøya
Geografi
Stad	Nord-Noreg
Koordinatar	69°02′55″N 17°27′05″E
Areal	53 km²
Høgaste punkt	Bergsheia (563 moh.)
Administrasjon
Land	Noreg
Fylke	Troms
Største busetnad	Merkesnes (79 innb.)
Demografi
Folketal	182 (2008)
Folketettleik	3,4 /km²

Dyrøya (nordsamisk Divrrát) er ei øy i Dyrøy kommune i Troms. Øya ligg mellom Senja og fastlandet, sørvest for Brøstadbotn, kommunesenteret i Dyrøy. Dyrøya har eit areal på 53 km², og det høgaste punktet på øya er Bergsheia på 563 moh. Øya har om lag 200 innbyggjarar.

Dyrøya er knytt til fastlandet med Dyrøybrua. Brua vart opna i 1994.

På Holm på Dyrøya ligg Dyrøy kyrkje frå 1880.

Det største vatnet på Dyrøya er Kalvøyvatnet (ofte kalla Kalvøya), som ligg i 187 meters høgd, midt mellom Bergsheia og Mossheia. Den enklaste oppgangen til vatnet er frå Forså om lag 1 km sørvest for Dyrøy kyrkje.

Busetnader

Dyrøya hadde 182 innbyggjarar i 2008, fordelt på tre grunnkretsar:

• Dyrøyhamn 59
• Merkesnes 79
• Espejord 44

Dyrøyhamn omfattar den sørlege delen av øya; Merkesnes og Espejord den nordlege. Den største bygda, Langhamn, ligg i Merkesnes grunnkrets. Folketalet på øya går gradvis nedover.

Hagenes

Under den andre verdskrigen vart Dyrøya brukt som kanonstilling av tyskarane for å ha oversikt over Tranøyfjorden. Det er om lag fire bunkersar på Hagenes og fire kanonstillingar. Bunkersane og kanonstillingane vart bygd av russiske krigsfangar. Under byggingsarbeidet vart ein russar med namn Alexej skoten då han prøvd å rømme. Dette er det einaste dokumenterte drapet på Hagenes under 2. verdskrigen.

Bakgrunnsstoff

• Kulturnett Troms: Dyrøya Arkivert 2006-12-08 ved Wayback Machine.