Eeles Landström

Eeles Landström
Statsborgarskap	Finland
Fødd	3. januar 1932 Viiala
Død	29. juni 2022 (90 år) Helsingfors
Idrett	friidrett
Tok del i	Sommar-OL 1960, Sommar-OL 1956, Sommar-OL 1952

Eeles Enok Landström (3. januar 1932–29. juni 2022) var ein finsk friidrettsutøvar og politikar frå Viiala som tevla i stavhopp og i tikamp. Han vart europameister i stavhopp i 1954 og 1958, og fekk OL-bronse i 1960. Alle åra 1953-60 vart han finsk meister i stavhopp. I si tid som aktiv var han 186 cm høg og hadde ei tevlingsvekt på 82 kg.

Friidrett

Landström deltok i tikamp under OL 1952 på heimebane i Helsingfors. Med 5 694 poeng (6 123 poeng etter dagens poengtabell) kom han på 14. plass. I denne tikamp-tevlinga gjekk han over 4,20 meter i stavhopp, ein prestasjon likt med han som kom på sjetteplassen i den reine stav-øvinga. Så etter 1952 dreiv han internasjonalt berre med stavhopp.

Under EM 1954 i Bern gjekk Landström og svensken Ragnar Lundberg begge over 4,40 meter i stavhopp-tevlinga, men Landström vart europameister då han hadde færre riv i tevlinga. I 1956 kom han på sjuandeplass i stavhopp med 4,25 meter under OL i Melbourne.

Landström forsvara EM-tittelen under 1958-meisterskapen i Stockholm. Med 4,50 m stoppa han, Manfred Preußger frå Aust-Tyskland og Vladimir Bulatov frå Sovjetunionen på same høgda, men atter fall talet på hopp i hans favør. To år seinare, under OL i Roma vann Landström stavhopp-bronsen med 4,55 meter, bakom USA-amerikanarane Don Bragg og Ron Morris.

Medaljar og plasseringar i internasjonale meisterskap

• OL 1952 i Helsingfors: Nr 14 i tikamp
• EM 1954 i Bern: Gullmedalje i stavhopp – 4,40 m, framom Ragnar Lundberg (same høgda)
• OL 1956 i Melbourne: Nr 7 i stavhopp – 4,25 m
• EM 1958 i Stockholm: Gullmedalje i stavhopp – 4,50 m, framom Manfred Preußger (sølv) og Vladimir Bulatov (bronse) (begge 4,50 m)
• OL 1960 i Roma: Bronsemedalje i stavhopp – 4,55 m

Politikk

Landström var i åra 1966-71 medlem av Den finske riksdagen. Han representerte Liberaliit (Liberalerna), eit parti som vart danna i 1965 og var representert i nasjonalforsamlinga til 1995.

Mellom 1982 og 2007 budde Landström i Spania.

Kjelder

• Denne artikkelen bygger på «Eeles Landström» frå Wikipedia på tysk, den 13. august 2012.
• Denne artikkelen bygger på «Eeles Landström» frå Wikipedia på finsk, den 13. august 2012.