Engesetfonna
Engesetfonna var ei snøfonn som råka bustadområdet Engeset nær Ørsta sentrum 10. februar 1979. Tre menneske, av dei to barn, miste livet.
Bakgrunn
[endre | endre wikiteksten]Etter snøver i desember 1978 vart det fleire veker med sterk kulde. Mange stader vart snøen omdanna til skare og rennsnø. I byrjinga av februar kom fleire dagar med nordleg vind og sterkt snøfall. Særleg i nordvende lesider samla det seg store snømengder.
9. og 10 februar gjekk det fleire snøfonner i Ørsta. Om morgonen fredag 9. februar vart ein brøytebil teken av ei fonn ved Skarbø ytst på Hjørundfjordstranda. Sjåføren vart ikkje funnen trass i at det vart leita med mannskap på land og dykkarar i fjorden.
Om lag klokka 4.30 natt til laurdag 10. februar vart ein trakkemaskin med to mann teken på Bondalseidet. Den eine kom seg fri og fekk varsla. Den andre vart funnen i live av hjelpemannskap etter om lag 3 timar.
Engesetfonna
[endre | endre wikiteksten]Klokka 7.45 trefte fonna dei øvste husa på Engeset. Ni bustadhus vart råka og meir eller mindre knuste. Nede på flata var fonna om lag 150 meter brei, og 300 - 500 meter lang. Eit svært omfattande redningsarbeid vart sett i gang. Mellom 800 og 1000 personar tok del i leitearbeidet. På det meste grov 500 personar i dei 4-5 meter høge snømassane. Redningsarbeidet var vanskeleg, då det låg mykje bygningsrestar i snøen. Etter vel 14 timar vart den siste av dei omkomne funnen.
Engesetfonna var i røynda to store mjellsnøfonner som losna om lag samstundes øvst i fjellsidene mellom Engesethornet, Kyrkjetinden og Saudehornet. Dei kom ned gjennom det same gjelet. Brotkanten var om lag 1000 meter lang og truleg nærmare 2 meter høg. Skredforskarar har rekna snømengda til minst 500 000 m³, kanskje det største kjende snøskredet i Noreg.
Kjelder
[endre | endre wikiteksten]- Magne Ivar Sætre: Fonnulukkene i 1979. Ørsta Røde Kors Hjelpekorps 50 år Ørsta 1992