Kjetil Stormark
| Kjetil Stormark | |
| Statsborgarskap | Noreg |
| Fødd | 25. mars 1971 (53 år) |
| Yrke | journalist, redaktør, faglitterær forfattar |
Kjetil Stormark (fødd 25. mars 1971) er ein norsk forfattar og journalist som driv «Noregs forsvarsevne»-prosjektet og den tilhøyrande nettstaden aldrimer.no.[1] Han er òg leiar av fagnettverket Hate Speech International, som overvakar ekstremistiske grupper i Europa, Nord-Amerika, Midtausten og Afrika. Stormark har tidlegare vore nyhenderedaktør i dagsavisene Laagendalsposten og Varden og ansvarleg redaktør i Dalane Tidende.
Karriere
[endre | endre wikiteksten]Stormark har vore journalist sidan 1987, i Arbeiderbladet (1994-1997), i VG (1997-2001 og 2002-2005).[2]
Han var presseråd ved den norske SN-delegasjonen i New York (2001-2002), den gongen Noreg var medlem av Tryggingsrådet). Fagleiar i PR-byrået JKL Oslo var han - 2005-2007. Leiar av SKUP – Stiftelsen for ei Kritisk og Undersøkjande Presse var han frå 2003 til 2005, og der var han styremedlem 2001–2003.[3]
Nettavisen publiserte bloggar av Stormark frå 2012 til mars 2015.
Prosjektet «Noregs forsvarsevne» og tilhøyrande nettstad
[endre | endre wikiteksten]Han driv (per 2016) prosjektet «Noregs forsvarsevne» som hittil har motteke 10,5 millionar kroner i støtte (2015-2016) frå Erling Lorentzen og fem andre bidragsytarar, blant dei fleire motstandsfolk.
Han driv nettavisa aldrimer.no.[4] Prosjektet driv kritisk og undersøkjande journalistikk om den sivile og militære beredskapen i Noreg og tryggingspolitiske tilhøve.
Prosjektet vart i april 2016 kritisert av SKUP-leiar Jan Gunnar Furuly og skuldgjeve for å vera ei «avansert form for content marketing». Kritikken vart avvist av Stormark, som viste til at nettstaden vert redigert etter Redaktørplakaten, Tekstreklameplakaten og Ver Varsam-plakaten. Det tyder at prosjektet driv uavhengig journalistikk som ingen andre enn redaktøren til nettstaden styrer.
Aldrimer.no/prosjektet Noregs forsvarsevne driv varslingsnettstaden SecuriLeaks.org, slik at varslarar skal kunna senda informasjon heilt trygt utan å avsløra eigen identitet. Nettstaden er integrert i TOR - The Onion Router - og føreset at ein brukar TOR Browser når informasjon vert lasta opp til varslingplattforma.
Fagnettverket «Hate Speech International»
[endre | endre wikiteksten]Stormark er leiar av fagnettverket Hate Speech International (HSI), som overvakar hatytringar, hatbrotsverk og ekstremistiske grupper i Europa, Nord-Amerika, Midtausten og Afrika. Nettverket vart etablert av Stormark og forfattar og journalist Øyvind Strømmen i 2013.
HSI mottek økonomisk støtte frå Utanriksdepartementet og stiftelsen Fritt Ord.
HSI driv òg ein eigen varslingsnettstad - ExtremeLeaks - for at varslarar skal kunna senda informasjon heilt trygt utan å avsløra eigen identitet. Nettstaden er integrert i TOR - The Onion Router - og føreset at ein brukar TOR Browser når informasjon vert lasta opp til varslingplattforma.
Klage til EOS-utvalet
[endre | endre wikiteksten]I 2002 forfatta Stormark ein artikkelserie om interne tilhøve i Tryggingstenesta til politiet (PST), saman med VG-kollega Tom Bakkeli. Serien stod på trykk i juli og oktober 2002. Stormark sende på same tid ei klage til Kontrollutvalet til stortinget for dei løynlege tenestene, det såkalla EOS-utvalet. I klaga bad Stormark utvalet om å undersøkja om det vart drive kjeldejakt på hans kjelder i kjølvatnet av artiklar om dei løynlege tenestene.[5]
Prisar
[endre | endre wikiteksten]- Årets frilansjournalist (2014). Kåring i regi av Norsk Journalistlag - Frilans.
- Sølv i kategori for nyskaping, Årets medieprisar 2009 (delast ut av Landsamskipnaden til Medieføretaka), for redesign av Dalane Tidende. Det same året fekk avisa òg heiderleg omtale i designkonkurransen til Scandinavian Society for News Design (SNDS), som eitt av totalt fem, nordiske medium.
- Edda Prisen til media for god lokaljournalistikk (2008) – saman med journalist Torfinn Skåttet – for avsløringa av «Pensjonsskandalen», der nærare 2 000 pensjonerte statstilsette må få etterbetalt ein kvart milliard i oppgjør etter at dei gjennom ei årrekkje mottok for lite pensjon frå Pensjonskassa til staten. Publisert gjennom meir enn 70 artiklar i Laagendalsposten. I saka vart det òg avsløra at meir enn 400 statstilsette var gått bort før dei (etterlatne) fekk pengane dei hadde krav på.
- Diplom Journalistprisen i Buskerud (2008) – i klasse nyhende/sport, saman med journalistane Anne Mone Nordahl, Elin Hansson, Lars Andreas Ellingsgard Øverli og Even Tråen, for artikkelserien «Eitt år etter 80-årsflommen». Publisert i Laagendalsposten.
- Journalistprisen i Buskerud (2007) – saman med journalist Torfinn Skåttet – for avsløringa av «Pensjonsskandalen».
- SKUP-diplom (1999) for avsløring av eit løynleg lagar for kjemiske stridmiddel utanfor Murmansk på Kolahalvøya i Russland.[6] Publisert i VG.
- SKUP-prisen (1998) for nyhendedekning og avsløringar om Bouchikhi-saka (Mossad-attentatet på Ahmed Bouchikhi på Lillehammer 21. juli 1973). Premiert for tre artikkelseriar i hhv Arbeiderbladet og VG.
Bibliografi
[endre | endre wikiteksten]- Da terroren rammet Norge : 189 minutter som rystet verden (Kagge forlag, 2011)
- Massemorderens private e-poster (Spartacus forlag, 2012)
- Bidragsyter til Gravende journalistikk. Metode, prosess og etikk av Guri Hjeltnes og Morten Møller Warmedal (red) (Gyldendal akademisk forlag, 2012)
Referansar
[endre | endre wikiteksten]- ↑ Forsvarsvenner gir Stormark fem millioner til journalistisk prosjekt, journalisten.no
- ↑ Kjetil Stormark Arkivert 2017-02-13 ved Wayback Machine., journalisten.no
- ↑ Full gass i en krisetid, journalisten.no
- ↑ info Aldrimer.no, arkivert frå originalen 19. september 2016, henta 30. mai 2017
- ↑ E-tjenesten nekter å svare på om de skal på kildejakt, aftenposten.no
- ↑ 1999-41 Kjemivåpen-saka[daud lenkje]
- Denne artikkelen bygger på «Kjetil Stormark» frå Wikipedia på bokmål, den 30. mai 2017.
Bakgrunnsstoff
[endre | endre wikiteksten]- Kjetil Stormarks blogg «Makt og avmakt» Arkivert 2016-05-20 ved Wayback Machine. på Nettavisa
- Logo sin Media Ltd
- Aldrimer.no - nettstaden til Prosjektet Noregs forsvarsevne
- SecuriLeaks.org Arkivert 2020-11-25 ved Wayback Machine. - varslingsnettstad for Aldrimer.no
- Hate Speech International
- ExtremeLeaks Arkivert 2017-06-06 ved Wayback Machine. - varslingplattform for Hata Speech International