Netiporn Sanesangkhom
Netiporn Sanesangkhom (thai เนติพร เสน่ห์สังคม, fødd 1996) er ein framståande thailandsk demokratiaktivist. Ho var elev ved Triam Udom Suksa vidaregåande skule i Bangkok, der ho var medlem av elevrådet. [1] Ho er medlem av den thailandske kvinneaktivistgruppa Taluwang, og vart dømt til fengsel for majestetsfornærming for å ha gjennomført ei meiningsmåling på kjøpesenteret Siam Paragon under demonstrasjonane i Thailand den 8. februar 2022. Ho byrja då ein sveltestreik i fengselet saman med medaktivist Nutthanit Duangmusit i protest mot å ha vorte varetektsfengsla, og kollapsa under eit vitneavhøyr på grunn av sterke magesmerter og trøyttleik.[2][3] Ho vart likevel nekta kausjon trass i å ha vorte send til sjukehus etter å ha sveltestreika i nesten 50 dagar.[4]
Ho vart lauslaten mot kausjon den 4. august 2022,[5] men den 31. januar 2024 vart likevel kausjonen hennar trekt tilbake, og ho vart arrestert. Samtidig vart også Thailands yngste dømde person for majestetsfornærming arrestert, ei då 14 år gammal jente med kallenamnet «Yok», som Netiporn var støttespelar for.[6][7]. Ifølgje straffedomstolen vart ho dømd for å ha brote vilkåra for kausjonen då ho deltok i ein demonstrasjon ved det thailandske kulturdepartementet den 6. august 2023.
Netiporn byrja ifølgje Thai Lawyers for Human Rights ein ny sveltestreik i fengselet den 27. januar 2024.[8] Ho vart send til fengselssjukehuset tysdag 8. februar, den 11. dagen av sveltestreiken, Ho hadde symptom på hepatitt og urinvegsinfeksjon, og var for svak til å gå.[treng kjelde] Den 26. februar 2024 vart ho på ny sende til fengselssjukehuset etter å ha hosta blod i tre dagar. Ho gav då for første gong samtykke til avgrensa behandling i og med at ho hadde hosta opp mykje blod. Ho vart behandla intravenøst med brekkingsdempande og syrenøytraliserande medisinar.[9] Ei oppdatering frå Thai Lawyers for Human Rights den 29. februar 2024 melde at ho heldt fram med å kasta opp blod. Blodet vart lysare og lysare for kvar dag. Ho hadde sterke magesmerter, kunne knapt gå, og hadde problem med å skilje drøymar frå røyndom.[10][11]
Kjelder[endre | endre wikiteksten]
- ↑ «ม. 112 : เปิดใจพี่สาว "บุ้ง ทะลุวัง" จากหนุน กปปส. สู่นักกิจกรรมทำโพลล์เกี่ยวกับสถาบันกษัตริย์» (på thai). BBC Thai. 11. juli 2022. Henta 31. januar 2024.
- ↑ «Thailand: Free Detained Critics of Monarchy» (på engelsk). Human Rights Watch. 19. juli 2022. Henta 31. januar 2024.
- ↑ «Thailand: Release hunger-striking activists: Netiporn ‘Bung’ Sanesangkhom, Nutthanit ‘Bai Por’ Duangmusit and Tantawan ‘Tawan’ Tuatulanon» (på engelsk). Amnesty International. 14. juni 2022. Henta 31. januar 2024.
- ↑ «Court refuses to release monarchy reformers who collapsed in court» (på engelsk). Coconuts Bangkok. 19. juli 2022. Arkivert frå originalen 31. januar 2024. Henta 31. januar 2024.
- ↑ «Two Thai hunger striking activists held on remand granted bail» (på engelsk). Thai PBS World. 4. august 2022. Henta 31. januar 2024.
- ↑ «ศาลสั่งถอนประกัน ‘บุ้ง’ เหตุพ่นสีลงบนธงราชินี-ชุมนุมหน้า วธ. แต่ไม่ถอนประกัน ‘ตะวัน’ ชี้ ไม่ผิดเงื่อนไขประกัน» (på thai). Prachatai. 26. januar 2024. Henta 31. januar 2024.
- ↑ «'ทะลุวัง' ชี้ ผิดปกติ หลังทัณฑสถานแจ้ง 'บุ้ง' ป่วยหนัก แต่ไม่ประสงค์ให้ทนายหรือใครเยี่ยม» (på thai). Prachatai. 31. januar 2024. Henta 31. januar 2024.
- ↑ «Activist’s bail revoked over protest at Ministry of Culture» (på engelsk). Prachatai English. 30. januar 2024. Henta 31. januar 2024.
- ↑ «‘บุ้ง’ กลับเข้า รพ.ราชทัณฑ์หลังอาเจียนปนเลือด 3 วันติด ยังอดอาหารต่อเพื่อ 2 ข้อเรียกร้อง» (på thai). Prachatai. 27. februar 2024. Henta 28. februar 2024.
- ↑ «อัพเดท 'บุ้ง - เนติพร' ยังอดอาหาร จิบน้ำปริมาณจำกัด มีอาการอาเจียนปนเลือด ปวดท้องรุนแรง» (på thai). Prachatai. 29. februar 2024. Henta 29. februar 2024.
- ↑ «Update การประท้วงอดอาหารและจำกัดน้ำ ของ #บุ้งทะลุวัง (29 ก.พ.)» (på thai). TLHR/X. 29. februar 2024. Henta 29. februar 2024.