Roald Aas

Roald Aas
Roald Aas i 1952 Foto: Leif Ørnelund / Oslo Museum
Statsborgarskap	Noreg
Fødd	25. mars 1928 Oslo
Død	18. februar 2012 (83 år) Oslo
Yrke	skøyteløpar, sykkelryttar
Roald Aas på Commons

Roald Edgar Aas (fødd 25. mars 1928 i Oslo, død 18. februar 2012) var ein norsk skøyteløpar.

Roald Aas var gjennom det meste av 1950-talet ein god nummer to i norsk skeisesport - etter Hjalmar Andersen og Knut Johannesen. Han tok ein NM-tittel i 1956; ellers vart han nr. 2 heile sju gonger. Han gjekk for Oslo Idrettslag fram til 1956, då meldte han seg inn i Oslo Skøiteklub.

Han stilte for Noreg i samtlege europa- og verdsmeisterskap mellom 1951 og 1960, og var nesten alltid blant dei ti beste. Han fekk bronsemedalje i eit VM (1958) og to EM (1957 og 1960). Han deltok i tre OL. I Oslo i 1952 tok han bronse på 1500 m, men i OL i Cortina d'Ampezzo vart det ingen topplassering. I Squaw Valley i 1960 gjekk han heilt til topps, og delte gullmedaljen med Jevgenij Grisjin på 1500 m.

Roald Aas var dessutan også ein dyktig syklist, og vann noregsmeisterskap i lagtempo, landevegsritt og 4000 meter banesykling. Etter at han avslutta skøytekarrieren vart han klubbtrenar for Oslo Skøiteklub.

I 1956 vart Roald Aas tildelt Egebergs Ærespris.

Personlege rekordar

• 500 m - 42,3
• 1000 m - 1.27,4
• 1500 m - 2.10,4
• 3000 m - 4.41,7
• 5000 m - 8.01,6
• 10 000 m - 17.08,2

Bakgrunnsstoff

• Om Roald Aas på SkateResults.com Arkivert 2007-03-11 ved Wayback Machine.