Itasca-sjøen

Frå Wikipedia – det frie oppslagsverket
Hopp til navigering Hopp til søk
Itasca-sjøen
Itasca-sjøen
Høgd over havet450 meter
Plassering

Itasca-sjøen
47°13′5″ N 95°12′26″ W

Itasca-sjøen er ein liten bresjø nordvest i Minnesota i USA. Han vert rekna som kjelda til Mississippielva.

Sjøen ligg i Clearwater fylke. Han er 4,7 km² stor (dvs. noko større enn Maridalsvannet i Oslo (3,9 km²)). Sjøen ligg 450 meter over havet og har stort sett ei djupne på mellom 6 og 11 meter.[1]

Det var geografen og etnologen Henry Rowe Schoolcraft (1793–1864) som fyrst fastslo at Itasca-sjøen var starten på det 3 770 km lange løpet til Mississippi mot Mexicogolfen. Dette skjedde i 1832. Schoolcraft hadde òg vore med på general Lewis og Clark-ekspedisjonen i 1820, då Cass-sjøen (lenger ned i elva) blei fastsett som kjelda til elva.

Namnet «Itasca» blei sett saman av dei latinske orda veritas, 'sanning' og caput, 'hovud'. Han plukka ut dei midterste bokstavane frå orda, sannsynlegvis for å få eit namn som høyrdest «indiansk» ut, og ifølgje si eiga forklaring også eit kvinneleg namn som høva til lokal mytologi.[2] På det lokale ojibwe-språket heiter sjøen Omashkoozo-zaaga'igan (Elgsjøen).[3]

Det finst elles ein annan sjø som i dag ber namnet Elgsjøen (Elk Lake). Denne har elvesamband med Itasca-sjøen, og somme har hevda at denne dermed er kjelda til Mississippi. Dette er likevel ikkje godkjent i fagkrinsar, fordi Elk Lake er så liten. Det same gjeld Nicolett Creek.

Det er verd å merka seg at Mississippi renn ut av Itasca-sjøen i nordleg retning, før ho svingar mot aust og etterkvart mot sør.

Utløpet vart elles flytt på 1930-talet. Ein kringliggande sump vart drenert, og området vart gjort meir turistvennleg. Det er faktisk mogleg enkelte stadar her å vassa over elva, noko som utgjer eit populært fotomotiv.

Frå 1891 har området rundt sjøen vore regulert til statleg naturpark.

Referansar[endre | endre wikiteksten]

  1. Om Itasca-sjøen på World Water Database; vitja 8. juli 2016.
  2. Upham, Warren. «Minnesota Place Names: A Geographical Encyclopedia». Minnesota Historical Society. Arkivert frå originalen 2011-01-08. Henta 14. august 2007. 
  3. Gilfillan, Joseph A. "Minnesota Geographical Names Derived from the Chippewa Language" in The Geological and Natural History Survey of Minnesota: The Fifteenth Annual Report for the Year 1886 (St. Paul: Pioneer Press Company, 1887)