Jens Steiro

Jens Steiro
Statsborgarskap	Noreg
Fødd	26. februar 1874 Alstadhaug
Død	13. oktober 1939 (65 år)
Yrke	lensmann, bonde, politikar
Politisk parti	Senterpartiet

Jens Jørgen Jensson Steiro (26. februar 1874–13. oktober 1939) var ein norsk gardbrukar og politikar frå Alstahaug som representerte Nordland og Bondepartiet på Stortinget i åra 1922-27.

Steiro var son til ein gardbrukar. I 1890 og -91 gjekk han to ulike kurs på Helgelands amtsskule. Elles i ungdomen deltok han i Lofot-fisket i ni vintrar, og arbeidde heime på farsgarden. Fire vintrar dreiv han fiskeoppkjøp i Lofoten, før han i tida 1900-03 var oppsynsbetjent under Lofot-fisket. Deretter var han 1904-06 lensmannsbetjent i Vågan.

Frå 1905 var Steiro brukar av farsgarden i Alstahaug. Samstundes tok han til som heradskasserar, ei stilling han hadde til han frå 1911 til 1924 var kasserar i Alstahaug Sparebank.

Steiro var varaordførar i Alstahaug frå 1910, seinare ordførar 1918-21 og 1925-27?. Han var også forlikskommissær. Steiro møtte på Stortinget i periodane 1922-24 og 1925-27, der han var med i den fyrste stortingsgruppa til Bondepartiet. Begge treårsperiodane var han medlem i Post- og telegrafkomiteen. I 1935 vart han vald til styreformann for Nordland landbruksskule, og same året styremedlem i Norges Kjøtt- og Fleskesentral.

Kjelder

• Stortingsbiografi Arkivert 2017-04-09 ved Wayback Machine.