Lillestrøm stasjon

Frå Wikipedia – det frie oppslagsverket
Hopp til navigering Hopp til søk
Stasjonsbygningen frå 1930 med den nye, låge bygningen frå 1998 til høgre
Perrongane
Lillestrøms stasjon på 1920-talet

Lillestrøm stasjon er ein jarnbanestasjon i sentrum av Lillestrøm, med Lillestrøm bussterminal rett attmed. Stasjonen ligg både på Hovedbanen, som opphavleg gjekk mellom Oslo Sentralstasjon og Eidsvoll stasjon, men nå berre har ordinær trafikk fram til Dal stasjon, og på Gardermobanen frå Oslo Sentralstasjon gjennom tunnelen Romeriksporten og via Oslo lufthamn, Gardermoen fram til Eidsvoll stasjon og vidare. Frå Lillestrøm stasjon går òg Kongsvingerbanen til Kongsvinger og vidare inn i Sverige. Stasjonen ligg 20,95 kilometer frå Oslo Sentralstasjon.

Hovedbanens fyrste stasjonsbygning i Lillestrøm var teikna av arkitektane Heinrich E. Schirmer og Wilhelm von Hanno, og opna då denne fyrste jarnbanestrekninga i Noreg stod ferdig i 1854. Bygningen vart teke ut or bruk som ekspedisjonslokale i 1863 av di stasjonen vart flytta i samband med at Kongsvingerbanen vart bygd, og i 1987 vart bygningen rive. Stasjonsbygningen i naturstein som markerer seg i bybiletet i dag, vart reist i 1930 etter teikningar av Gudmund Hoel og Arne Henriksen, og teke i bruk i 1934. Bygningen er freda, men er ikkje i ordinær bruk etter at ny stasjon var bygd i samband med bygginga av Gardermobanen i 1998. Den nye stasjonsbygningen ligg vegg i vegg med den gamle, teikna av arkitekt Arne Henriksen, og har vorte heidra med Statens byggeskikkpris. Her er det gjennomgang på tvers under spora, og oppgangar til plattformene frå gjennomgangen.

Det er to sykkelhotell (innelukka parkeringshus for syklar) knytt til stasjonen, eit på kvar side av stasjonsområdet. Husa har plass til høvesvis 394 og 412 syklar, og er tilgjengelege døgnet rundt. I det eine er det 14 plassar der elektriske syklar kan verte ladet opp.

Bakgrunnsstoff[endre | endre wikiteksten]