Mona Holm

Mona Christine Holm (fødd 5. august 1983) er ein norsk tidlegare friidrettsutøvar frå Kolvereid i Nord-Trøndelag som utmerkte seg i sleggjekasting. Ho vart norsk meister i øvinga ni år i rad, 2004-12. Holm var medlem i Norna/Salhus og seinare IK Tjalve.

Aktiv

Holm kom på andreplass i sleggjetevlinga for kvinner i NM 2002 og 2003. Frå 2004 til 2012 var ho Noregs suverent beste i øvinga og vann samtlege sleggje-gull i desse ni åra. Ho vart tildelt kongepokalen for vinnarkastet under NM i friidrett 2007 og på ny under NM i friidrett 20011 i Byrkjelo. Under meisterskapen i Byrkjelo den 13. august smekka ho til med heile 70,43 meter, gjeldande norsk rekord til 2019-sesongen.

Holm deltok i EM i friidrett 2006, VM i friidrett 2007, EM i friidrett 2010, VM i friidrett 2011 og EM i friidrett 2012, utan nokon gong å kvalifisere seg til finale.

Elles var Holm ein habil diskoskastar som sikra seg bronsemedaljen i øvinga under NM 2004 og NM 2010.

Norske rekordar

Resultat	Stad	Land	Dato	År
60,92 m	Szombathely	Ungarn	30. mai	2004
60,92 m	Reykjavík	Island	19. juni	2004
62,19 m	Gävle	Sverige	19. juni	2005
62,82 m	Bergen	Noreg	20. august	2005
63,39 m	Banská Bystrica	Slovakia	18. juni	2006
64,50 m	Helsingborg	Sverige	30. juni	2006
64,89 m	Bottnaryd	Sverige	2. juli	2006
67,80 m	Halle	Tyskland	19. mai	2007
67,96 m	Tønsberg	Noreg	6. juni	2010
70,43 m	Byrkjelo	Noreg	13. august	2011