Ottar Landfald
| Ottar Landfald | |
| Fødd | 18. mai 1919 Verdal |
| Død |
28. desember 2009 (90 år) |
| Yrke | politikar, bonde |
Ottar Ingebrigt Landfald (18. mai 1919–28. desember 2009) var ein norsk politikar, fødd i Verdal i Nord-Trøndelag. Han representerte Hedmark fylke og Senterpartiet på Stortinget frå 1973 til -81.
Landfald var son til ein gardbrukar og gjekk sjølv på ein norskdriven jordbruksskule i Sverige i 1943/44. Etter eit førebuande kurs ved Hamar Katedralskole 1945/46 utdanna han seg til sivilagronom ved Norges Landbrukshøgskole 1946-49. Frå 1950 til 1980 var han gardbrukar på garden Kåterud i Stange, også overlærar ved Jønsberg landbruksskole 1951-53.
Frå 1956 til -68 var Landfald medlem i Stange formannskap. Han var formann 1959-70 i kornutvalet til Norges Bondelag, 1961-65 i Hedmark Bondelag og 1969-77 i fylkeslandbruksstyret i Hedmark. Seinare var han 1983-89 nestformann i styret i Statens kornforretning.
Valperiodane 1973-77 og 1977-81 var Landfald stortingsrepresentant for Senterpartiet og Hedmark. Han var i begge periodane medlem i Forsvarskomiteen.
Landfald vart tildelt Deltakarmedaljen med diplom i 1998.