Sandra

Namnetrekket til den amerikanske juristen Sandra Day O'Connor.

Namnetrekket til den italienske skodespelaren Sandra Mondaini.

Den amerikanske skodespelaren Sandra Dee i ein filmtrailer.

Sandra er eit kvinnenamn som er ei kortform av Aleksandra, som er eit namn med gresk opphav. Den avleidde forma Sandra skal fyrst ha vorte teke i bruk i Italia som kortnamn for Alessandra, den italienske forma av namnet Aleksandra. Tilsvarande mannsnamn er Sandro og Sander. Sandra kan også vere ei kortform av Kassandra.

Sandra i Noreg og Sverige

I Noreg var namnet ein del bruka på slutten av 1800-talet, men gjekk so nesten ut av bruk til det tok seg noko oppatt frå 1940-talet og utover. Namnet fekk ein stor oppsving på midten av 1980-talet og har helde seg ganske populært sidan, men det har ikkje noko år vore mellom dei ti mest gjevne jentenama i Noreg sett under eitt. Dei som fekk namnet på slutten av 1800-talet budde til størstedelen i Nordland og Troms, hovudområdet frå etter andre verdskrigen var Sør-Vestlandet.

Mellom 1996 og 2005 har det kvart år vore mellom 134 og 220 jentebarn som har fått namnet Sandra. 1. januar 2006 var det 4592 jenter og kvinner i Noreg som hadde Sandra som fyrste førenamn.

I Sverige har namnebruken hatt ei liknande utvikling som den i Noreg, men namnet vart der endå meir populært på 1980-talet. Sandra var på sitt mest populære det sjette mest gjevne namnet til jentebarn i Sverige. Pr. 31. januar 2005 var det 24 155 jenter og kvinner som hadde Sandra som fyrste førenamn i Sverige.

Namnedag

Sandra har namnedag 17. februar både i Noreg og Sverige.

Kjende namneberarar

• Sandra Day O'Connor (f. 1930), amerikansk jurist, første kvinnelege dommar i høgsteretten i USA
• Sandra Mondaini (f. 1931), italiensk filmskodespelar
• Sandra Dee (1942–2005), amerikansk filmskodespelar
• Sandra Cretu (f. 1962), også kjend som berre Sandra, tysk popsongar som hadde ein kjempehit på midten av 1980-talet med Maria Magdalena.
• Sandra Bullock (f. 1964), amerikansk filmskodespelar
• Sandra Oh (f. 1971), kanadisk skodespelar
• Sandra Kim (f. 1972), belgisk popsongar, vinnar av Melodi Grand Prix 1986

Fiktive figurar med namnet Sandra

• Sandra Salamander er ein rollefigur i Tramteaterets Pelle Parafins Bøljeband

Bakgrunnsstoff

• Ola Stemshaug, Kristoffer Kruken: Norsk personnamnleksikon. Det Norske Samlaget. Oslo 1982. ISBN 82-521-2036-9
• Namnestatistikk og tabellar for Noreg frå Statistisk sentralbyrå
• Namnestatistikk for Sverige frå Statistiska centralbyrån