Blomsterpotte

Frå Wikipedia – det frie oppslagsverket
Hopp til navigering Hopp til søk
Klassisk leirepotte.

Blomsterpotte eller plantepotte er ei potte som kan brukast til å dyrka plantar i. Dei blir brukt i gartneri, heimar og hagar til å dyrka fram småplantar til vidare bruk eller til å husa potteplantar permanent. Potter finst i ulike storleikar, og kan ha enkel utforming eller vera meir dekorative.

Tradisjonelt blei blomsterpotter gjerne laga av brent leire (terrakotta). I dag er det blitt vanlegare med blomsterpotter av plastmateriale. Ein har også gått meir over til å bruka pluggbrett i staden for potter ved oppal av småplantar.[1]

Historie[endre | endre wikiteksten]

Ein har brukt potter til formeiring og transport i lang tid. Allereie frå Det gamle Egypt er det kjend at potter blei brukte til plantetransport.[2] Også dei gamle grekarane og romarane brukte blomsterpotter. Den greske filsofen Theofrastos skildra i si 'Plantehistorie' frå 300-talet f.Kr. korleis ein sådde trefrø i potter. I si bok om jordbruk frå 100-talet f.Kr. skildrar Cato den eldre korleis potter ein hadde sådd frø eller planta stiklingar i kunne knusast og planten plantast i jorda. Arkeologiske pottefunn støtter denne skildringa. Pottene ein har funne har hol i botnen, kanskje både for å gje drenering og for å la røtene veksa ut frå potta.[3]

Potter har også vore brukt til dekorasjon. Funn frå Pompeii og Herculaneum tyder på at ein kunne setja dei opp rundt eit basseng i midten av eit atrium.[2] Under renessansen kunne ein bruka fint utforma potter til dømes i hjørnene av parterre-design, langs terrassekantar eller på toppen av murar.[3]

Kjelder[endre | endre wikiteksten]

  1. «Blomsterpotter», Store norske leksikon, 1. juni 2015, https://snl.no/blomsterpotter 
  2. 2,0 2,1 Curl, James Stevens og Susan Wilson (2015), «container», The Oxford Dictionary of Architecture, Oxford University Press, http://www.oxfordreference.com/view/10.1093/acref/9780199674985.001.0001/acref-9780199674985-e-6416 
  3. 3,0 3,1 Patrick Taylor, red. (2006), «container», The Oxford Companion to the Garden, Oxford University Press, http://www.oxfordreference.com/view/10.1093/acref/9780198662556.001.0001/acref-9780198662556-e-0426