International Association of Lighthouse Authorities
| International Association of Lighthouse Authorities | |||
| Skipa | 1957 | ||
|---|---|---|---|
| Hovudkontor | Saint-Germain-en-Laye | ||
| Nettstad | https://www.iala-aism.org/  | ||
International Association of Lighthouse Authorities, forkorta IALA, er ein ikkje-profiterande organisasjon som vart skipa i 1957 for å ta vare på og å føre over nautisk ekspertise mellom medlemmer og å gje råd. IALA søker å la medlemslanda samarbeide for å få til mest mogleg einsarta navigasjonssystem verda over. Hovudkontoret for organisasjonen ligg i Saint-Germain-en-Laye, Frankrike.
IALA er først og fremst kjent for bøye- og sjømerkesystemet som vert nytta til å lose skipsfarten og for utviklinga av det automatiske identifikasjonssystemet, AIS.
Medlemmer
[endre | endre wikiteksten]Organisasjonen har om lag 200 medlemmer av tre ulike kategoriar:
- nasjonale medlemmer, Afrika har 16 medlemmer, Amerika 15 medlemmer, Asia 23 medlemmer, Oseania 3 og Europa 28, deriblant Noreg som er representert med Kystverket
- vitskaplege institusjonar, tenesteytarar med ansvar for navigasjon som hamnevesen i store hamner
- materialfabrikantar, leverandørar og rådgjevarar i navigasjonshjelpemiddel
Arbeid
[endre | endre wikiteksten]Det er sett ned fem permanente tekniske komitéar som kvar har to årlege møte. Komitéane dannar ryggraden i arbeidet innanfor IALA og dei er delt inn etter fagområde:
- ingeniørmessige og miljømessige sider ved utvikling av navigasjonshjelpemiddel (bøyer, fjernkontroll, straumforsyning og anna), bevaring og dokumentasjon av utgåtte hjelpemiddel
- elektronisk navigasjon, automatisk identifikasjonssystem AIS
- hjelpemiddel for navigasjonsleiing
- radionavigasjon, landbaserte og satellittbaserte navigasjonssystem (radarar og GNSS)
- sjøtrafikktenester, drift av trafikksentralar
Kystverket har medlemmer i alle komitéar.
Kvart fjerde år samlar medlemmene seg i ein konferanse. I 2008 var denne konferansen helden i Bergen.