Instefjord-Lavik-Vadheim
| Instefjord-Lavik-Vadheim | |||
| Trasé | Instefjord-Lavik-Vadheim | ||
|---|---|---|---|
| Rutenett | Tidlegare ferjesamband i Sogn | ||
| Driftselskap | Fylkesbaatane | ||
| Oppretta | 1955 | ||
| Nedlagd | 1965 | ||
| Erstatta av | Lavik-Oppedal-Brekke | ||
| Fylke | Sogn og Fjordane | ||
Instefjord-Lavik-Vadheim var eit ferjesamband over Sognefjorden mellom Instefjord i dåverande Brekke kommune, Lavik i dåverande Lavik kommune og Vadheim i dåverande Kyrkjebø kommune. Sambandet opna den 2. juli 1955 som del av eit sumarleg gjennomgåande veg- og ferjesamband mellom Bergen og Sunnfjord. Frå Bergen var det veg nordover til Hordvik i dåverande Åsane kommune, og fyrste ferjesamband Steinestø-Knarvik over Salhusfjorden. Frå Knarvik i dåverande Hamre kommune gjekk vegen nordover til Lindås i dåverande Lindås kommune, og nordaustover til Fonnebostsjøen og det andre ferjesambandet Fonnebost-Solheim over Fensfjorden og innover Masfjorden. Vidare frå Solheim gjekk vegen til Instefjord og det tredje ferjesambandet Instefjord-Lavik-Vadheim.
Fylkesbaatane sette inn MF «Vetlefjord» på det nye sambandet, og turen over Sognefjorden tok om lag ein time. På denne tida hadde korkje Lavik eller Instefjord ferjekai, og bilane måtte køyra om bord på sliskar. Derimot var det høveleg ferjekai i Vadheim, det nordaustlege vendepunktet på ruta med veg vidare mot Førde.
I 1957 vart Fonnebost erstatta av Sævråsvåg som ferjeleie for sambandet over til Solheim.[1] Vegen til Sævråsvågen gjekk austover frå Vågseidet sør for Lindås.
Samanhengande veg mellom Lavik og Vadheim opna i 1960, og Vadheim vart sløyfa frå sambandet.
I 1964 vart Oppedal lagt til som eit mellomstopp, og året etterpå vart Instefjord erstatta av Brekke.[2] Med dette fekk sambandet den nye forma Lavik-Oppedal-Brekke.
Kjelder
[endre | endre wikiteksten]- ↑ Historienemnda for bruopninga (1994). Nordhordlandsbrua : frå kongstanke til røyndom. s. 51. ISBN 82-993235-0-9.
- ↑ Firda (24. august 1965). «Ferjesambandet til Lavik blir omlagt». Olai Nordeide, Oddvar Nordeide og Per Nordeide. s. 1. Henta 14. november 2024.
- Sogn og Fjordane (1. juli 1955). «Ferjeruta Instefjord-Lavik i gang i morgon.». Einar Svartefoss. s. 2. Henta 14. november 2024.
- Kristin Ese (2007). På god veg : Veghistorie i Sogn og Fjordane. Førde: Selja forlag. s. 157-158, 159-160. ISBN 978-82-91722-70-2.
- Magnus Helge Torvanger (2008). Frå dampskip til gassferjer : Fjord1 Fylkesbaatane 150 år : 1858-2008. Førde: Selja forlag. s. 84, 85. ISBN 978-82-91722-93-1.
Bakgrunnsstoff
[endre | endre wikiteksten]- Finn Borgen Førsund: «Dampen og kaia : stoppestader for Fylkesbaatane i Sogn og Fjordane 1858-1998» på nettstaden til Nasjonalbiblioteket
Denne samfunnsartikkelen som har med Vestland å gjere, er ei spire. Du kan hjelpe Nynorsk Wikipedia gjennom å utvide han.
