Mahogni

Trevyrke frå Swietenia macrophylla.

Mahogni er namnet på trevirke som er kjenneteikna av ein vakker raudbrun farge når det er polert. Dei fleste trea som blir kalla mahogni høyrer til mahognifamilien (Meliaceae). Mahogni er lett å bearbeida og motstandsdyktig mot termittåtak og vatn, noko som gjorde at ein tidlegare brukte det til å laga møbler og båtar. I dag er dei fleste former for mahogni verna som truga artar av CITES-avtalen.

Namnet «mahogni» blei først brukt om to tretypar i den nye verda; vestindisk mahogni eller cuba-mahogni (Swietienia mahagoni) frå Karibia og hondurasmahogni (Swietienia macrophylla) frå Sentral- og Sør-Amerika. Seinare er det òg blitt brukt om liknande treslag frå både Afrika og Asia, som Khaya ivorensis, Khaya senegalensis og nokre artar i slekta Carapa frå Afrika, indisk mahogni om fleire artar frå slekta Toona, kvit mahogni av kasjutre (Anacardium occidentale) og australsk mahogni, av Eucalyptus marginata.