Poul Holst

Frå Wikipedia – det frie oppslagsverket
Hopp til navigering Hopp til søk
Poul Holst
Fødd 6. november 1789
Drammen
Død

28. august 1840
Christiania

Yrke jurist, politikar

Poul Holst (6. november 178928. august 1840) var ein norsk jurist, embetsmann og stortingsmann.

Holst var fødd i Drammen, der far hans var kjøpmann. Sjølv vart han student frå Kongsberg skule i 1807, og cand. jur. i 1811. Han var tilsett i det danske kanselli i København, vende tilbake til Noreg i 1814 og vart same året justissekretær i høgsterett. Frå 1819 var han ekspedisjonssekretær i Kyrkjedepartementet. I 1829 vart han konstituert justitiarius i Kristiania stiftsoverrett, to år seinare assessor i Noregs Høgsterett.

Poul Holst var med i nokre kongelege kommisjonar. Mellom anna var han med i kommisjonen om fattiglova 1829, og han var formann i brenneri-kommisjonen 1833.

Holst representerte Kristiania på Stortinget i 1833, 1836, 1836-37 og 1839. På alle fire tingsamlingane var han president i Odelstinget. I 1833 var han elles formann i kyrkjekomiteen, i komiteen om Bodøsaka og om slottsbygninga og medlem av kriminallovkomiteen. Også i 1836 og 1836-37 var han formann i kyrkjekomiteen, og han var formann i fullmaktskomiteen. I 1836-37 var han i tillegg formann i kriminallovkomiteen. Heldt fram som formann i fullmaktskomiteen i 1839, elles formann i valkomiteen og i justiskomiteen. Til liks med dei andre stortingsmennene frå Kristiania i denne perioden høyrde Holst heime i den liberale og nasjonale fløya i Stortinget. 1818-39 var Holst stortingsarkivar.

Holst var medlem av bystyret i Kristiania 1837-40. Han døydde i hovudstaden i 1840.

Kjelder[endre | endre wikiteksten]

  • Lindstøl, Tallak: Stortinget og Statsraadet 1814-1914. Kristiania, 1914
  • Store Norske Leksikon