Stein Haugen

Frå Wikipedia – det frie oppslagsverket
Hopp til navigering Hopp til søk
Stein Haugen
Statsborgarskap Noreg
Fødd 10. januar 1933
Lom
Død

31. mars 2008
Bærum

Idrett friidrett
Yrke friidrettsutøvar

Stein Erik Haugen (10. januar 193331. mars 2008) var ein norsk friidrettsutøvar og politimann frå Lom som sanka seg 22 medaljer i noregsmeisterskap i tida 1953 til 1967, 14 i diskos og 9 i kulestøyt. Han vart norsk meister i diskoskasting sju gongar på rad, 1958-64, og vann også to NM-gull i kulestøyt, 1959 og 1960. Haugen forbetra den norske diskosrekorden seks gongar, og kulerekorden to gongar. Hans personbeste i kulestøyt frå 1961 var 16,42 m, i diskoskasting nådde han 56,37 m i 1964.

Aktiv[endre | endre wikiteksten]

Haugen var ein årviss medaljevinnar i friidretts-NM i tida 1955-67, då han fekk med seg heim minst ein medalje i anten kulestøyt eller diskoskasting. Han vann sin fyrste NM-tittel i 1958 og sette sine fyrste norske rekordar i 1959-sesongen. Den 28. mai 1959 sletta han den elleve år gamle diskosrekorden på 52,32 m, tilhøyrande Ivar Ramstad, då han i Sarpsborg smelte til med 53,50 m. Like etter sende han også den sju år gamle kulerekorden til Per Stavem over i soga, då kula landa etter ei luftferd på 16,08 m på Bislett stadion.

Sommaren 1960 støytte han så kula 16,14 m under eit stemne i Halden. Sitt endelege personbeste på 16,42 m oppnådde han i september 1961, i landskampen mot Frankrike og Jugoslavia i Paris, men før den tid hadde Bjørn Bang Andersen støytt 16,75 m.

Den norske rekorden i diskoskasting forbetra Haugen to gongar i OL-sesongen 1960. I byrjinga av juni månad la han på vel ein meter til 54,54 m i Stockholm, knapt to månader etter plussa han på 14 cm til 54,68 m på Bislett stadion. Han deltok i diskos under Sommar-OL 1960 i Roma, med 53,36 m enda han på ellevteplassen. Haugen deltok elles EM 1958 og EM 1962, begge gongane rauk han ut i kvalfiseringa.

Haugen heldt fram å forbetre den norske diskorekorden. Den 17. september 1961 passerte han 55-meterstreken med 55,82 m. Han auka til 56,29 m i slutten av august 1963, begge desse rekordane sette han på Bislett stadion. Sin siste noregsrekord, og hans aller lengste diskokast, presterte han med 56,37 m i eit stemne på Stockholm stadion 24. juni 1964.

Medaljar i norske meisterskap[endre | endre wikiteksten]

  • 1953: Sølvmedalje i kulestøyt – 14,13 m, bak Sverre Øverby
  • 1955: Bronsemedalje i diskoskasting – 44,96 m
  • 1956: Sølvmedalje i diskoskasting – 47,69 m, bak Reidar Hagen
  • 1957: Sølvmedalje i diskoskasting – 47,30 m, bak Reidar Hagen
  • 1958: Gullmedalje i diskoskasting – 50,33 m, framom Reidar Hagen
  • 1959: Gullmedaljar i kulestøyt – 15,53 m, og diskoskasting – 50,79 m
  • 1960: Gullmedaljar i kulestøyt – 16,04 m, og diskoskasting – 53,75 m
  • 1961: Gullmedalje i diskoskasting – 54,56 m, og sølv i kulestøyt – 15,86 m
  • 1962: Gullmedalje i diskoskasting – 53,38 m, og sølv i kulestøyt – 16,07 m
  • 1963: Gullmedalje i diskoskasting – 54,38 m, og bronse i kulestøyt – 15,71 m
  • 1964: Gullmedalje i diskoskasting – 54,05 m, og bronse i kulestøyt – 15,58 m
  • 1965: Bronsemedaljar i diskoskasting – 50,78 m, og i kulestøyt – 15,82 m
  • 1966: Sølvmedalje i diskoskasting – 51,00 m, bak Tormod Lislerud (51,04 m)
  • 1967: Sølvmedalje i diskoskasting – 53,22 m, og bronse i kulestøyt – 15,33 m

Haugen var busett i Bærum i Akershus.

Kjelder[endre | endre wikiteksten]

  • Magnus Breili: Sport i navn & tall. 1971
  • friidrett.no