Striperyggmaurfugl

Striperyggmaurfugl
Striperyggmaurfugl
Utbreiing og status
Status i verda: Livskraftig Utbreiinga av striperyggmaurfugl
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Sporvefuglar Passeriformes
Familie:	Maurfuglar Thamnophilidae
Slekt:	Myrmorchilus
Art:	Striperyggmaurfugl M. strigilatus
Vitskapleg namn
Myrmorchilus strigilatus zu Wied-Neuwied, 1831

Striperyggmaurfugl, Myrmorchilus strigilatus, er ein mellomstor maurfugl i den biologiske familien Thamnophilidae. Arten er monotypisk i slekta Myrmorchilus. Han har to underartar, nominatforma M. s. strigilatus (Wied, 1831) og M. s. suspicax (Wetmore, 1922).

Skildring

Striperyggmaurfuglen er 15 til 16 cm lang og veg 23 til 26 gram. Vaksne hannar av nominatforma har ei kvit augebrynstripe (supercilium) og ei mørk linje gjennom auget. Krona, halsen og ryggen er raudbrune med svarte striper; overgump og haledekkfjører er raudbrune. Dei sentrale halefjørene er raudbrune og dei ytre svarte med kvite ytterkantar og tuppar. Vengene er svarte med noko raudbrun på kantane av svingfjørene; vengdekkfjørene deira er svarte med kvite tuppar. Halsen og brystet er svart. Resten av undersida er kvit med svarte flekker på sidene og flankane og eit brunt skjær på undergump. Vaksne hoer har brunfarga hals, bryst og buk med mørkare striper på sidene og brystet. Hannane av underarten M. s. suspicax har ein brunfarga supercilium, flankar og undergump; hoene har ein brunleg supercilium og djupare brunfarga flankar og undergump enn nominatforma.

Utbreiing og habitat

Striperyggmaurfuglen har ei disjunkt utbreiing. Nominatfuglen finst i det nordaustlege Brasil i eit område som er grovt avgrensa av austlege Piauí, Rio Grande do Norte og nordlege Minas Gerais. Underarten M. s. suspicax finst i dei vestlege delane av Brasils delstatar Mato Grosso og Mato Grosso do Sul, i søraustlege Bolivia, i vestlege Paraguay og i Nord-Argentina så langt sør som Santa Fe-provinsen. Arten er ein standfugl.

Den nominatunderarten held hovudsakleg til i caatinga-skogområder og krattmarker. Underarten M. s. suspicax lever i skogsområde og krattmarker i Gran Chaco. I begge økosoner føretrekkjer han område med tett botndekke opp til omtrent 1100 meter over havnivå.

Åtferd

Striperyggmaurfuglen lever av leddyr, spesielt insekt. Den søkjer vanlegvis etter mat enkeltvis eller i par, og for det meste på bakken under tett vegetasjon, sjølv om den vil ete så høgt som 2 m over bakken. Han plukkar gjennom lauvstrø og bakkelevande bromeliaer, strekkjer seg opp for å sanke frå lauvverk, og hoppar stundom for å sanke frå høgare blad, greiner og slyngplantar.

Dei to kjende reir var opne, koppforma med tørt gras, plassert på bakken; begge inneheldt to egg.

Dei to underartane av striperyggmaurfuglen ser ut til å ha same song. Det er ein «ekstra høg, skarp ’sreet-soweét’» som av og til blir følgd av ein «skrill, litt søkkande ’sreet-sreet-sreet-sruw-sruw’». Lokkropet til arten er ein plystretone på opptil 0,5 sekund.

Kjelder

• Artikkelen er basert på ei omsetting av «Stripe-backed antbird» frå Wikipedia på engelsk, den 24. mai 2025
• Zimmer, K.; Isler, M.L.; Kirwan, G. M. (2020). del Hoyo, J.; Elliott, A.; Sargatal, J.; Christie, D. A.; de Juana, E., red. «Stripe-backed Antbird (Myrmorchilus strigilatus), version 1.0». Birds of the World Online. Cornell Lab of Ornithology, Ithaca, NY. doi:10.2173/bow.stbant2.01. 

Referansar

Bakgrunnsstoff

Commons har multimedium som gjeld: Striperyggmaurfugl

• (no) striperyggmaurfugl hos Artsdatabanken
• (en) striperyggmaurfugl i Catalogue of Life
• (en) striperyggmaurfugl i Global Biodiversity Information Facility
• (en) striperyggmaurfugl hos ITIS
• (en) striperyggmaurfugl hos NCBI
• (en) Kategori:Myrmorchilus strigilatus – bilete, video eller lyd på Wikimedia Commons
• Myrmorchilus strigilatus – detaljert informasjon på Wikispecies