Preikestolen
Frå Wikipedia – det frie oppslagsverket
Preikestolen er namn på eit fjellplatå på nordsida av Lysefjorden i Forsand kommune i Rogaland fylke. Preikestolen er eit kjend turistmål i regionen. Platået er tilnærma flatt, om lag 25x25m og ligg 597 moh. Før stien inn til Preikestolen ligg Preikestolhytta. På andre sida av fjorden ligg Kjerag.
Frå gammalt av hadde platået namnet Hyvlatånnå (høveltanna). Rundt 95 000 personar vitja Preikestolen i løpet av de fire sommarmånadane i 2006[1]. Det er god utsikt over Lysefjorden og heiane rundt frå platået.
Det var truleg ei frostsprenging for 10 000 år sidan som gjorde slik at Preikestolen vart danna. Kanten av isbreen låg da like oppfor fjellet. Preikestolen har ein fleire meter djup sprekk tvers over platået som truleg òg er eit resultat av frostsprengingar. Geologar har konkludert med at Preikestolen er trygg sjølv om mange utan årsak trur at fjellplatået vil falle ned når dei ser sprekken.
Normal gangtid tur/retur parkeringsplassen ved Preikestolhytta på sti er 1-2 timar kvar veg. Turen frå Preikestolhytta er 3,8 km med ein høgdeskilnad på 330 meter. Stien er utbetra med mellom anna gamle jernbanesviller over ei myr.
