Aleksandr Tikhonov

Frå Wikipedia – det frie oppslagsverket
Gå til: navigering, søk
Aleksandr Tikhonov
Александр Тихонов.jpg
Fødd 2. januar 1947
Aleksandr Tikhonov på Commons

Aleksandr Ivanovitsj Tikhonov[a] (fødd 2. januar 1947) er ein russisk tidlegare skiskyttar og seinare idrettsleiar frå landsbyen Ujskoje i Tsjeljabinsk oblast, som representerte Sovjetunionen. Gjennom 14 sesongar, 1967-80, var han ein av dei beste skiskyttarane i verda, og er med sine 11 VM-gull, av desse fem individuelle, og fire OL-gull i stafett ein av dei beste skiskyttarane gjennom tidene.

Liv og gjerning[endre | endre wikiteksten]

Tikhonov fekk sin VM-debut i 1967. Etter å ha vorte nummer ni i den individuelle øvinga fekk han plass på Sovjetunionen sitt stafettlag som gjekk inn til sølvmedalje, einast slått av Noregs fire utvalde løparar. Under dei olympiske vinterleikane i Grenoble året etter tok han sølvmedaljen bak norske Magnar Solberg på 20 km, før han vann OL-gull for Sovjetunionen på stafetten. I dei tre nestkomande vinterleikane, 1972, 1976 og 1980, gjekk han også inn til gullmedalje i stafettøvinga.

Under verdsmeisterskapen 1969 i Zakopane vart Tikhonov verdmeister i begge øvingane, både på 20 km og i stafett. Året etter kopierte han prestasjonen under VM i Östersund. VM-gull i stafett tok han også i 1971, men måtte i den individuelle øvinga sjå seg slått av Dieter Speer frå Aust-Tyskland.

I 1973 gjentok Tikhonov prestasjonane frå VM 1969 og 1970 og vart dobbelt verdsmeister med siger både i den individuelle tevlinga over 20 km, samt i stafett med Sovjetunionen over 4x7,5 km stafett. På sovjetisk heimebane i 1974 var det for fyrste gongen to individuelle øvingar på VM-programmet, utan at Tikhonov fekk medalje i korkje. Derimot vann han og Sovjetunionen sitt femte strake VM-gull, og den sjuande stafett-meisterskapen på rad.

Etter å ha vunne sitt tredje olympiske gull i Innsbruck 1976, vart han seinare i OL-sesongen verdsmeister på 10 km i Antholz; sprintøvinga over 10 km med to skytingar var ikkje med i OL-programmet det året. Året etter, under VM i skiskyting 1977, forsvarte Tikhonov VM-tittelen på 10 km og vart for sjette gong verdsmeister med Sovjetunionen i stafett. I tillegg fekk han bronsemedaljen på 20 km, hans fyrste VM- og OL-medalje av den valøren. Tikhonov tok si siste individuelle medalje då han kom på sølvplassen på 20 km under VM 1979 i tyske Ruhpolding. Vinteren 1980 i Lake Placid tok han si siste OL/VM-medalje då han gjekk andreetappen for Sovjetuinionen sine olympiske meistrar i stafett. I alt vann han 22 medaljar (15-5-2) i verdsmeisterskap og olympiske leikar.

Medaljar og besteplasseringar i internasjonale meisterskap[endre | endre wikiteksten]

Idrettsleiar[endre | endre wikiteksten]

Tikhonov har i lang tid vore leiar for Russlands skiskyttarforbund. I mai 2002 vart han vald til visepresident i det internasjonale skiskyttarforbundet (IBU). Han gjekk ut av styret i IBU i 2010.

Lovbrytar[endre | endre wikiteksten]

Tikhonov vart i 2000 skulda for å ha vore delaktig i ein plan om å myrde guvernøren av Kemerovo oblast, Aman Tulejev. Mellom andre vart ein bror av Tikhonov i 2002 dømt til fire års fengsel for si rolle i drapsplanen. I 2007 vart også Aleksandr Tikhonov dømt til fengsel i tre år i same saka, men fekk straks amnesti.

Merknadar[endre | endre wikiteksten]

  1. Russisk skrift Александр Иванович Тихонов

Kjelder[endre | endre wikiteksten]

  • Sportsboken, årgangane 1967-1980