Borussia Dortmund

Frå Wikipedia – det frie oppslagsverket
Gå til: navigering, søk
Klubbmerket til Borussia Dortmund

Ballspielverein Borussia 09 e.V. Dortmund, til dagleg kjend som Borussia Dortmund eller BVB, er eit tysk idrettslag i Dortmund i Nordrhein-Westfalen. Fotballklubben Borussia Dortmund spelar i den tyske toppserien; Bundesliga. Klubben er ein av dei fotballklubbane i Tyskland som har vunne flest trofe.

Borussia Dortmund vart stifta i 1909 av 17 fotballspelarar frå Dortmund. Høgdepunktet for fotballaget er sigeren i Meisterligaen i 1997. Også i 2013 nådde klubben finalen i Meisterligaen, som end med tap 1-2 for Bayern München. Borussia Dortmund gjekk til topps i Cupvinnarcupen i 1966, og vart då den fyrste tyske klubben som sigra i ei europeisk fotballturnering for klubblag. Derimot tapte Borussia Dortmund finalen i UEFA-cupen 1993 og på ny finalen i same turneringa i 2002. Borussia Dortmund har vunne åtte tyske seriemeisterskap og tre nasjonale cupmeisterskap.

Sidan 1974 har Borussia Dortmund spela heimekampane på Westfalenstadion, det største fotballstadion i Tyskland. Borussia Dortmunds draktfargar er gule trøyer og svarte bukser. Klubben har i lang tid rivalisert med Schalke 04, ein klubb frå nabobyen Gelsenkirchen.

Kjelder[endre | endre wikiteksten]