Heikki Hasu

Heikki Hasu
Statsborgarskap	Finland
Fødd	21. mars 1926 Sippola
Død	5. april 2025 (99 år)
Idrett	kombinert, langrenn
Tok del i	cross-country skiing at the 1952 Winter Olympics – men's 4 × 10 kilometre relay, Kombinert under Vinter-OL 1948, Kombinert under Vinter-OL 1952, Vinter-OL 1948
Utmerkingar	Holmenkollmedaljen, ridder av 1. klasse av Finlands løves orden, Cross of Merit, in gold, of the Finnish Sports

Heikki Vihtori Hasu (21. mars 1926–5. april 2025) var ein finsk langrenns- og kombinertløpar, bonde og politikar frå Sippola. Han vart olympiameister i kombinert i 1948 og verdsmeister to år seinare. I 1952 vann han OL-gull med Finlands lag i 4 x 10 kilometer stafett. Elles vann han OL-sølv i kombinert i 1952, og VM-sølv i stafett i 1950.

Hasu var gardbrukar i Sippola og seinare i Anjalankoski. På 1960-talet representerte han Bondepartiet/Centerpartiet i den finske nasjonalforsamlinga.

Skiidrett

Hasu vann gullmedaljen i kombinert under OL 1948 i St. Moritz, med stor margin til landsmannen Martti Huhtala som fekk sølvet. Han braut dermed den norske sigerrekka i kombinert i olympiske leikar, beste nordmann kom fyrst på sjetteplass. Hasu kom også på fjerdeplass i 18 kilometer langrenn, tre svenskar forsynte seg med medaljane.

I 1949 vart Hasu nummer to i kombinertrennet i Holmenkollen, norske Per Sannerud vann. Under VM 1950 i Lake Placid gjekk Hasu atter til topps i kombinert, han var også med på det finske stafettlaget som tok sølv; Sverige tok gull, Noreg fekk bronse. Men i Holmenkollen kom han som året før på andreplassen, Simon Slåttvik syrgde for norsk siger. I Lahti i 1951 var rollene omsnudd, der vann Hasu føre Slåttvik.

Vinteren 1952 vann Hasu ein suveren siger i kombinert i Lahti-spelen og vart nummer to på 18-kilometeren. Hasu deltok så med bravur i OL 1952 i Oslo. Han kom på fjerdeplass på 18 km og tok sølv i kombinert, som året før vart Simon Slåttvik hans overmann i kombinerttevlinga. Til sist gjekk Hasu startetappen på stafetten, der Finland vann gull med klar margin. Etter olympiaden var han tildelt Holmenkollmedaljen.

Hasu vann i 1953 kombinertrennet i Lahti-spelen for femte og siste gong. Året etter avslutta han med å verte nummer ni i kombinert i ski-VM i Falun.

Politikk

Hasu vart vald inn i nasjonalforsamlinga, Den finske riksdagen, i 1962 for Bondepartiet. Han hadde sete i riksdagen til 1966. Ved parlamentsvalet i 1966 tapte han plassen sin, men då det vart skrive ut nyval året etter, fekk han nye tre år (1967-70) i riksdagen for partiet som hadde endra namn til Centerpartiet.

Kjelder

• Denne artikkelen bygger på «Heikki Hasu» frå Wikipedia på tysk, den 1. mars 2013.
• Denne artikkelen bygger på «Heikki Hasu» frå Wikipedia på finsk, den 1. mars 2013.