Tønne Huitfeldt (1925–2007)

Frå Wikipedia – det frie oppslagsverket
Hopp til navigering Hopp til søk
Tønne Huitfeldt
Fødd6. april 1925
Død17. mars 2007 (81 år)
Ranggeneral

Tønne Huitfeldt (fødd 6. april 1925 i Oslo, daud 17. mars 2007) var ein norsk offiser (generalløytnant) i Hæren. Han hadde ei rekkje sentrale leiarposisjonar i Forsvaret og i NATO.

Andre verdskrigen[endre | endre wikiteksten]

Under andre verdskrigen kom Huitfeldt seg over til Storbritannia via Sveits.[1] Han tenestegjorde i den norske brigaden i Skottland og vart i 1942, berre 17 år gammal, oppteken ved den norske Krigsskolen i London.[1] I 1944 vart han beordra til teneste i 2. bergkompani, der han var troppssjef, og deltok med dette i frigjeringa av Finnmark.[1][2]

Militær karriere i Noreg og NATO[endre | endre wikiteksten]

Etter krigen heldt Huitfeldt fram i Forsvaret og fekk etter kvart sentrale leiaroppgåver.

Huitfeldt var i Tysklandsbrigaden frå 1948 til 1949.[3] 1954–1955 tok han vidare militær utdanning ved U.S. Army Command and General Staff College. Etter Suezkrisa i 1956 var han sjef for det norske geværkompaniet i SN-styrken i Gaza. Huitfeldt vart i 1960 utnemnd til sjef for Garnisonen i Sør-Varanger. Han var deretter i generalstaben før han i 1964 vart sjef for Krigsskolen. I 1970 studerte han ved Royal College of Defence Studies i Storbritannia.

Huitfeldt vart utnemnd til generalløytnant i 1977. Frå 1977 til 1981 øvstkommanderande i Nord-Noreg.[3] Deretter fekk han ei sentral stilling i Brussel som direktør for NATOs internasjonale militære stab.[1] Huitfeldt sat i denne stillinga frå 1981 til 1985.

Frå 1984 til 1996 var Huitfeldt redaktør for Norsk Militært Tidsskrift. Han var ein aktiv deltakar i den offentlege debatten om forvarsspørsmål.

Utmerkingar[endre | endre wikiteksten]

Huitfeldt var tildelt ei rekkje utmerkingar.[4] For innsatsen under andre verdskrigen mottok han Deltagermedaljen og Haakon VIIs 70-årsmedalje, og dessutan dei britiske utmerkingane France and Germany Star og Defence Medal. For tenesta i UNEF I mottok han SNs ekspedisjonskorpsmedalje. Huitfeldt var Kommandør av St. Olavs Orden, kommandør av den belgiske Leopold IIs orden, av Republikken Italias fortenstorden og av Jugoslavias stjerneorden.

Kjelder[endre | endre wikiteksten]

  1. 1,0 1,1 1,2 1,3 «Mellom barken og veden i Brussel», Aftenposten, 11. mai 1985, s. 31.
  2. «Tønne Huitfeldt - 2». Norsk biografisk leksikon (norsk). 28. september 2014. 
  3. 3,0 3,1 Hvem er Hvem? 1984, Oslo: Kunnskapsforlaget, 1984, s. 240.
  4. Bjørn Steenstrup: Hvem er Hvem? 1979, Oslo: Kunnskapsforlaget, 1979, s. 292-293.