Thor Knudsen

Frå Wikipedia – det frie oppslagsverket
Hopp til navigering Hopp til søk
Thor Knudsen
Fødd 30. mai 1927

Tønsberg

Død 10. januar 2006
Parti Høgre

Thor Haakon Knudsen (30. mai 192710. januar 2006) var ein norsk pressemann frå Tønsberg og stortingsrepresentant for Høgre i tida 1977-89.

Knudsen var son til ein kommunearbeidar. Sjølv tok han examen artium i 1947 og arbeidde som journalist i Tønsberg Blad frå 1947 til 1956, bortsett frå den tida då han gjorde militærteneste i Tysklandsbrigaden 1948-49. I 1956 fekk han jobb i Høgres Pressebyrå, der han var stortingsmedarbeidar 1956-58, redaksjonssekretær 1958-68 og politisk redaktør 1968-70. Frå 1971 var han redaktør i Sandefjords Blad til han vart vald inn på Stortinget i 1977. Perioden 1971-80 var han styremedlem i Norsk Telegrambyrå.

Knudsen sokna til den konservative fløya i Høgre, med eit særleg sterkt engasjement i forsvars- og tryggingspolitikken. Han var 1970-71 statssekretær i Forsvarsdepartementet og representerte frå 1977 til 1989 Vestfold fylkeStortinget. Alle tolv stortingsåra var han medlem i Forsvarskomitéen, som nestformann frå 1981 og Høgre sin forsvarspolitiske talsmann til 1989. Tida 1981-89 var han også president i Lagtinget, og sentralstyremedlem i Høgre. Som stortingsrepresentant var han delegat til KSSE-konferansene i 1977, 1981 og 1985.

Knudsen var styremedlem i interessegruppa Folk og Forsvar frå 1971 til 1991, dei siste elleve åra som formann. Perioden 1977-89 var han styremedlem i Den norske Atlanterhavskomité, og 1989-95 president i Norges Forsvarsforening.

Kjelder[endre | endre wikiteksten]