Vellekla

Håkon jarl den mektige. Teikning av av Christian Krohg til Heimskringla i 1899

Vellekla er eit islandsk skaldekvad – ei dråpa – dikta av skalden Einar Skålaglam , truleg gjort ferdig litt etter år 986. Det er eit hyllingsdikt til ladejarlen Håkon Sigurdsson den mektige. Namnet Vellekla blir oftast tolka til å bety gull-mangel.

Versemålet i Vellekla er dróttkvætt. Slik vi kjenner diktet i dag, er det ei samanstiling av vers som finst i Heimskringla, Fagerskinna, Den yngre Edda og Jomsvikingsoga. Truleg har diktet hatt deler som er komne bort.

Dei første versa fortel om kampane Håkon jarl hadde mot Eirikssønene, om korleis han tok hemn for drapet på faren og om korleis han fekk herredømmet over landet. Jarlen blir prisa fordi gudane har vendt attende til landet og det fred og gode år i riket:

No ligg under jarlen alt nordanfor Vika, herredømet åt Håkon, hærkjempa, vidt seg breier

Nú liggr allt und jarli (ímunborðs) fyr norðan (veðrgœðis stendr víða) Vík (Hôkunar ríki).

Ingen høgboren krigar på jorda er fødd som gjorde slik fred, utanom Frode

Engi varð á jǫrðu ættum góðr nema Fróði gæti-Njǫrðr, sás gerði, geirbríkar, frið slíkan.

Vidare i Danevirke-bolken blir det fortalt om striden i Danmark, der Håkon fekk siger og jaga den tyske keisaren Otto II på flukt. Dei siste versa har motiv som tyder på at dei kan ha vore lagt til etter at Håkon jarl fekk siger i slaget i Hjørungavåg (Jomsvikingslaget).

Bakgrunnsstoff

• Einar Skålaglam i NORSK BIOGRAFISK LEKSIKON
• Vellekla av Einar Skålaglam (Skaldic Project)
• Vellekla på dansk, frå heimskringla.no
• Einarr skálaglamm Arkivert 2006-07-21 ved Wayback Machine. Alle diktene til Einar med korte notiser om skalden på islandsk